Shillong, Rymphang 01 : Ka Hynniewtrep National Liberation Council (HNLC) ha ka sngi Saitjain kala ong ba ka Sixth Schedule bad ka Article 371 kim dei kiei kiei lait na ka jingriam kam sain pyrthei.
“Ki paid ka Hynniewtrep ki dei ban kyndit na ka jingshisha kaba tasam : Ka 6th Schedule bad ka Article 371 kim dei kiei kiei ruh lait na ka jingriam kam sain pyrthei-ki kynjri the bala ai rong ksiar, ka ruh ba shna pynaram. Ki dei kiba la shna bha ban shukor bad pynngeit ia ngi ba ngi la ioh eiei, katba ha jingshisha, ngi dang shah pyniaid ha ki rukom synshar nongwei. Kine kim dei ki jingjop hynrei ki jingtehkti jong ka sain pyrthei bala sop da ka silk-ba mut ban pynhun ia ngi katba ka jingsynshar jong ngi ka dang shah tuh ha kiwei” ong u General Secretary cum-Publicity Secretary ka HNLC Bah Sainkupar Nongtraw ha ka kyrwoh.
Ula ong “Hynrei ngi, ki Hynniewtrep, ngi dei ban kylli ialade, hato ngi dei kiba khlem khyndew khlem shyiap ? naduh ki por hyndai, ngi dei kiba longtrai iala ka jong ka jaka, iala ka kolshor bad ka nusib jong ngi. Lada ngi dei kiba khlem jaka, lehse kan don jingmut ba ngin kyrpad ban ngi ioh ia ka jingshakri ba kyrpang hapoh kane ka rukom synshar ba pynjari. Hynrei kane kam dei satia ka jingshisha. Ngim shym la wad ia ka jingisynei lane ne ki jingmyntoi na ki bor nongwei-Ngi pynskhem iala ka jong ka hok ba aipateng kum ka Ri”.
“Ka Sorkar India ka kyntait ban iathuh ia ka Bri jong ngi, hynrei don kiba lehkmen ba ioh 6th Schedule, ka bym shym la kdup ia baroh ki jaka Hynniewtrep-Kumno ngin hun ia ka jingpyniaid shiliang iala ka jong ka Ri? Balei ban dawa Article 371 haba ka Assembly ka dang iakhleh lang bad ki Garo, Bengali bad kiwei, kaba pyntlot ia ka bor synshar khadar jong ngi?. Balei ban dawa ia ka Articlce 371 ia ka Meghalaya katba dang ialehklet ia ka hok ban synshar bad shim rai hi dalade u Hynniewtrep? Ban pdiang ia ka kyrdan laitluid lane kyrdan ba kyrpang ka long kumba pdiang ia ka along bala pynwan dur bha. Ka Sorkar India kan pynlong ia ngi ban sngewlong kongsan hynrei kan nym ailad satia ia ngi ban long laitluid. Tang u biej uba bakla ia u kynjri ksiar ia ka jinglaitluid” ong u Bah Sainkupar.
U la bynrap, “Ka histori jong ngi ka long kaba shai—la thmu ban pynduhjait ia ki tnat tynrai jong ngi. U Bah J. J. M. Nichols Roy, wat la u long u Khristan uba bha, hynrei um shym la long u nongsynshar ri uba bha na ka bynta ki briew jong ngi. Ka jingmut jingpyrkhat nongsynshar phareng jong u ka la pynlong ia u ban pyntlot ia ki Syiem jong ngi, da kaba tip ba kham bun na ki Syiem jong ngi ki dei ki nongbud jong ka Niam Tynrai. Kane kam dei kaba shu jia ryngkhat hynrei ka dei ka sienjam sain pyrthei ban knieh noh ia ka Hynniewtrep na ka jingsynshar laitluid jong ngi. Ha kata ka por, ki nongialam jong ngi ki la iapait iapra— kawei ka kynhun ba la ialam da u Bah Joy, kawei pat da ka Federation of Khasi States (FKS). Mynta, kito kiba dang iai bteng ban lehkmen ne dawa ia ka 6th Schedule ne ka Article 371 ki shu pdiang ia ka jingthok jong ki nongsynshar phareng, da kaba bakla ia u kynjri jong ka jingkiew shaphrang.”
Ha kajuh ka por, u Bah Sainkupar u la ong “Ha ka ri jong ngi, la pynhiar ia ki Syiem jong ngi tang kum ki Syiem, bad la pynhap ia ka bor jong ki Syiem jong ngi hapoh ka jylla bad ka sorkar, ka nuksa kaba shai bha jong ka jingleh arsap ia ki hima ban pynneh ia la ka jong ka synshar syiem haba knieh noh ia ka jingsynshar jong kiwei pat.”
“Ynda ngi la bat hi ia ka kyrdan sain pyrthei jong ngi, ka HNLC kan thaw ia ka dorbar tynrai ka ban pynphai biang ia u Syiem sha ka kyrdan kaba dei hok jong ki kum u khlieh jong ka ri, da kaba pynskhem biang ia ka jinglong trai jong ki paidbah jong ngi bad burom ia ka jinglong nongialam ba shisha jong ngi”, u la ong.
 ha ka sngi Saitjain kala ong ba ka Sixth Schedule bad ka Article 371 kim dei kiei kiei lait na ka jingriam kam sain pyrthei.){kind=link}