Shillong Nailur 29: Ki nongialam bad ki dkhot jongka Khasi Students Union badka Hynniewtrep Youth Council bad kiwei pat, hynne ka sngi Saitjain kila leit ban ialum hakhmat jongka Shillong Airport, kaba don ha Umroi, Ri Bhoi District ban pyrshah ia ka jingwan iuhkjat ka jongu Jagadguru Shankaracharya uba ialam ia ka kynhun ban dawa ba dei ban khang noh ia ka bam dohmasi hapoh ka ri baroh kawei.
Ka Sorkar Jylla kala rai ban khang ia ka jingwan hiar ka liengsuin ba wan kit kyrpang (Chartered Flight) ia ka kynhun ki shitniam hindu -ka Jyotish Peethadheeshwar Shankaracharya Avimukteshwarandah, ha Shillong Airport, Umroi bad ka sorkar jylla kan sa thoh sha ka Airport Authority of India (AAI) ba kan kyntait ha ka ban ai ia ka jaka hiar ia katei ka liengsuin jong katei ka kynhun.
Ka kynhun kaba thmu ban ialap ban pyrshah bam doh masi kala pyntip ba u Jagadguru Shankaracharya yn wan poi ha ka por 12 baje mynsngi ha Shillong Airport namar ba kam shim la don satia kano kano ka jingkhang pyrshah ban wan hiar ka liengsuin namar ba ka Airport Authority of India kam lah ban khang bad ka bor ka shong ha ka DGCA bad Civil Aviation Ministry.
Ki bor district jong ka Ri Bhoi bad ki pulit kila syrtap ha katei ka Airport ban peit ba kam dei ban mih kano kano ka jinghuri hura kaban ktah ia ka shongsuk shongsaiñ.
