Shillong Nailar 22: Ka Wrestling Association of Meghalaya kala pynlong iaka jingialang ha ka 19 tarik u Nailar bad kala rai ban pynlong iaka Training bad Selection Camp ha u Nailur/Risaw bad la iakren halor ka North East Olympic Games 2022 kaban long naduh 31 tarik u Risaw haduh 5 tarik u Naiwieng 2022 ha Shillong.
Ia katei ka jingialang la pyniaid da u President u Bah John F Kharshiing, ha ka jingiadonlang ki dkhot na kiwei ki district bad la shim ia ka rai ban pynskhem ia ki hynniew ngut ki nongkitkam na ka bynta ban pyndep ia ki kot kiba donkam na ka bynta ban ioh ia ka jingithuh na ki bor bapher bapher.
Ki nongkitkam kiba la shah jied ki kynthup ia u John F. Kharshiing, u Vice President bah Raldeen Bryan Shabong, Vice President bah Isaiah Kharmawphlang, General Secretary bah Sunny P. Dkhar, Assistant General Secretary bah Regifull Thongni, Assistant General Secretary bah Rissan Well Lahong bad u Treasurer bah Shri. Coverfull Marngar.
Ka jingialang kala rai ruh ban pynlong ia ka Training bad Selection Camp ha nongbah Shillong ha u bnai Nailur/Risaw 2022 bad la buh ia Selection Committee ban jied ia ki nongiashim bynta ha ka North East Olympic Games 2022 kaban ha Shillong.
Ki dkhot jong ka Selection Committee ki kynthup ia u Isaiah Kharmawphlang ban peit iaka East Khasi Hills District, bah Coverfull Marngar iaka Ri Bhoi District, bah Khrawpyrkhat Rashir ban peit iaka West Khasi Hills District, bah Rissan Well Lahong ban khmih iaka West Jaintia Hills District, u Dipulin Marak ban peit iaka West Garo Hills District katba u President bad u General Secretary kin dei ki dkhot jong kine ki Committee.
Ka WAM kala rai ruh ban kyrpad ia ka tnad Sports and Youth Affairs ban thaw lad ban pynioh jaka ialehkai bad ban ai iaka Wrestling Mat kaban long kaba kongsan na ka bynta ka North East Olympic Games 2022.
Shuh shuh, kiba kwah ban rung lane ban iashimbynta kum ki nongialehkai lympat ki lah ban phone sha ki nongkitkam ha la ki District lane ban phah ka jingtip sha u President +91-9436102663 ne General Secretary, +91-9366592985.
