Shillong, Nailar 22: Ka Iingkashari Meghalaya High Court, hynne ka sngi nyngkong, kala bthah ia ka Sorkar Pdeng ban khmih ia ka jingdonkam ban shna ia ki surok ha ki Jylla ka Thain Shatei Lam Mihngi khamtam ki Jylla kiba long lum.
“La kyrmen ba ka Sorkar Pdeng kan peit ia ka jingdonkam jong ki Jylla NE khamtam ki Jylla ba long lum namar ka jing shna ia ka surok ban pynsuk ia ki paidbah ha ka leit ka wan ka dei ka hok tynrai kaba dei ban pynurlong” ong ka Iingkashari ki arngut ki Nongbishar haba bishar ia ka PIL.
Ia kane ka PIL la mudui da u Arnold G Momin. Haba shong bishar, ka Sorkar Jylla kala pan por ban iakren bad ka Sorkar Pdeng lane ki Shnat treikam jong ka ba kin pyllait ia ka song pisa bynrap.
Namar kane, ka Iingkashari kala rai ban sa shong bishar biang ia kane ka PIL hadien lai taiew. Ka jing shong bishar kan long biang ha ka 14 tarik Nailur.
