Shillong, Nailar 23 : Kum shi bynta ban pynmlien ia ka met ban smat ban marehkai bad ruh ban kyntiew artad ia ka kam jngohkai pyrthei na ka liang ka Real Sports of India kaba ju tip ruh kum ka Sportive Run Safari na Kolkata kan pynlong ia ka marathon ha Mawlynnong, ka shnong kaba khuid tam ha dewbah Asia ha ka 17tarik u Nailur mynta u snem kaban sdang bad pynkut ha jaka pynieng kali kaba don ha Mawlynnong hi.
Na ka liang u Uttam Dhar, u wei na ki nongtrei kam lajong ban kyntiew ia ka kam jngohkai ryngkat ka kam ialehkai na Kolkata, ha ka sngi Nyngkong u la iathuh ba ka jingmut jong kane ka prokram ka long ban kyntiew ia ka kam jngohkai pyrthei ha katei ka jaka ba don ka khappud jong ka India Bangladesh khamtam eh ha Mawlynnong bad ki jaka ba marjan lyngba ka marathon – halor ka phang “Dekho Apna Desh- Incredible Meghalaya” nalor kiwei kiwei ki jingialap kum ka Fit India Movement for Healthy Meghalaya & Healthy India; Beti Bachao Beti Padhao ban pynkup bor ia ki longkmie bad ruh ban ioh ia ka Meghalaya khuid bad kaba jyrngam bad khring ia ki nongwan jngohkai.
Ha kane ka lympung kin don haduh lai bynta ki jingiakhun, kata 21.1 km, 10 km bad 5 km, kynthup lang ia ki nongshong shnong kiba la noh ka rta.
U ong ruh ba ki don bun ki nongialehkai ba ieid ia ka jingialehkai na kylleng ki bynta jong ka jylla kiba la pyni ia ka jingthrang jong ki ban shim bynta ha katei ka lympung ba pyniaid da ka Sportive Run Safari.
Ia kane ka jingialehkai yn kyrshan ruh da ka ophis jong ka DC East Khasi Hills, SDO (Civil) Pynursla, Dorbar Shnong Mawlynnong bad ruh da ka Shillong Press Club.
“Ngi pdiang sngewbha ia baroh ki nongmareh sha katei ka lympung marathon kaba nyngkong eh ha Mawlynnong, Meghalaya, kane hi kan rah shuh shuh ia ka jingitynnad jong kane ka jaka kaba don ha khappud India Bangladesh kaba lah ban iohi kyndiang ia ka Bangladesh na ka view point kaba don ha Mawlynnong,” ong u Uttam.
Shuh shuh u ong ruh ba “ka marathon kadei kawei na ki jingialehkai kaba lah wat ban pyndonkam na ka bynta ban kyntiew iaka kolshor bad ruh ban ialap pyrshah drok ruh na bynta ki samla,” u la bynrap biang.
La kyntu ruh ia kito kiba kwah ban shim bynta ki lah ban rejistar ialade ha ka https://bit.ly/MawlynnongRS
bad ka tarik ba khatduh ban pdiang kan long ha ka 25tarik mynta u Nailar, 2022.
