Shillong, Nailut 19 : Kmba bthah da u Myntri Rangbah ka Jylla, ki bor district ha ka sngi Balang, kila pynlong ia ka special drive ban weng lut ia ki waiar cable kiba kyllain rynjain bad ba shu snoh ha ki post elektrik ha ki jaka ba kongsan ka Shillong.
Kane ka jingweng ia ki waiar cable kala long ha sawdong ka Ophis u DC, ka thain IGP bad Raj Bhavan, ha kaba bun ki waiar cable kila shu sdien rynjain bad lummuh lumtham, kaba ktah ia ka jingitynnad ka sor bad buh ha ka jingma ia ka jingshngain u paidbah.
Ia kane ka kam la leh kum shibynta na ka jingpyrshang jong ki bor district ban wanrah ia ka jingitynnad ka sor, jingshngain u paidbahbad ka jingpyniaid ha ka rukom kaba dei ia kiei kiei baroh ha sor.
Ki bor district kila ban jur ruh ia ka jingdonkam ki agency, ki service provider bad ki cable operator ban pynthikna ba ki dei ban pynbeit janai bha ia ki cable bad ban weng noh ia ki waiar ki bym pyndonkam shuh.
Ki bor district kin dang iai bteng ban leh ia kane ka kam ha kiwei pat ki jaka khnang ban pynthikna ia ka jingkhuid, jingshngain bad kiba ryntih ha kylleng ka nongbah Shillong.
