Shillong, Nailar 19: U President ka UDP u Bah Metbah Lyngdoh ha ka sngi Balang ula ong, ba ka seng kala shimkhia ia ki mat kiba la pynsngew da ki MLA jong ka bad ka pynpaw ba ia baroh ki rai la shim hadien ka jingiasyllok bad baroh kiba don bynta lang bad ula kyntait ban don ia kino kino ki jingtip ba katto katne ngut ki MLA ka seng ki don jingthmu ban pyniasoh noh bad ka BJP.
Hadien ba la dep lum ia ka jingialang jong ka Central Executive Council ka UDP, u Bah Lyngdoh ula kubur ba kala don ka jingiapher jingmut hapoh jong ka seng bad ula ong ba kane ka kam kadei kaba dang iakren hapoh jong ka seng.
“Peit ha kano kano ka longiing, ka seng kin don beit ki jingiapher jingmut ia ki jingpynsngew, ka jingiapher ha ka rukom pyrkhat pyrdain. Bad ngi lah iai pynthikna ba ngin sngap ia baroh bad ban shimkhia ia ki mat kiba la pynsngew” ula ong.
Ula banjur ba ka seng kala don ia ki rukom treikam ban shimkhia ia kino kino ki jingeh ne jingud jingnam.
“Shu jer ia nga lada ka don kano kano ka seng sain pyrthei ka bym don ia kano kano ka jingiapher jingmut ha kaba iadei bad kino kino ki jingsngew ne jingai jingmut. Kane kan iai don beit. Kumta haba mih kum kine, ngi ju ai ia ka rynsan ba ngin lah ban iakren, sam bad ban pynbeit noh. Ngi don ia ki rynsan ki bapher bapher kaba ngi ia kren, jingialang jong ka seng, CEC baad kiwei kiwei ki rynsan” ong u Bah Lyngdoh.
“Ka baar kaba nga kwah ban kdew hangne da kaba shai bha, ba ha kino kino ki jingjia ne kano kano ka jingshim ia ka rai kaba dei ban shim, ngi pynthikna ba baroh kito dei ban shimkhia lyngba ka jingiasyllok bad man la kiba donbynta lang ha ka seng” ula bynrap.
Halor ka jingkynnoh bad katto katne ki MLA ka UDP ki don ia ka jingthmu ban pyniasoh noh bad ka BJP, u Bah Metbah Lyngdoh ula ong ba ym don jingtip eiei.
“Ngam don jingtip eiei shaphang kata. Nga kwah ban kylli na phi, kidei kiei kita, kaei ka kyrteng ka jongki? Hadien kata ngan sa lah ban pynshai. Ngam don jingtip eiei shaphang kata” ula ong.
U Nongialam ka UDP ula shah kylli jingkylli ruh shaphang ka jingleit Delhi dang shen da ki nongialam ka seng.
U Bah Metbah ula ong ba katei ka jingleit ki nongialam ka seng kadei ban leit iakren halor ka mat jong ka FCRA bad u Myntri Kam Pohiing ka ri.
“Phi lah ban iohi ia ka kyrwoh khubor kaba la batai bniah da u Bah Lahkmen Rymbui. Nga tharai katei kala pynhun ia ka jingkylli. Nyngkong eh, kaba kongsan tam kadei halor ka FCRA. Namar ba ki lah dep ban iakynduh u Myntri Kam Pohiing ka ri ha Delhi, ula shim ruh ia ka lad bad ka kynhun ban pynsngew ruh ia kiwei ki jingsngewkhia kiba iadei bad ka jylla” ong u Bah Lyngdoh.
“Kila leit ban iakren markhmat dalade hi. Kane ka long kaei kaei kaba kongsan bha. Ngi lah rah ia kitei ki jingsngewkhia kaba ka jylla baroh kawei kala mad bad da ki katto katne ki bynta jong ka imlang sahlang” ula bynrap.
U Bah Lyngdoh ula ong, ba ka jingialang jong ka CEC kala pynleit jingmut ha kaban pynkhlain ia ka seng hashwa ban mih kino kino ki jingtynjuh ha ka kam sain pyrthei.
“Ka mat kaba kongsan ka long ban pynkhlain shuh shuh ia ka seng. Kadei kadei ka mat kaba ngi lah iatai bha. Ha kaba iadei bad ka buit treikam jong ka seng, ngi ieh beit ha ka jingstad jong ka seng hi. Ngin iaid beit katkum ka rukom iaid jong ka seng. Ngi ngin pynthikna ba katei ka bynta kan poi shaduh sha ki shnong ki thaw” ula ong.
