Shillong, Risaw 21: Ka seng Hynniewtrep Achik National Movement (HANM) Riwar Mihngi Circle kala leit ban kynduh ia u Symbud Myntri Rangbah ka jylla bah Prestone Tynsong ban pynsngew iaka jingshah ktah jong ki shnong kiba don ha khappud jong ka thain Riwar Mihngi bad ka ri Bangladesh na ka jingker sainar shiah.
Haba kren sha ki lad pathai khubor u president ka HANM Riwar Mihngi Circle u bah Shaibor Nongrum ula iathuh ba naka liang ka seng dang shen kala leit ban jurip iaki shnong ha khappud bad lap ba ki don bun tylli ki shnong kiba shah ktah ha kane ka jingker sainar hapdeng ka India bad Bangladesh.
U bah Shaibor ula iathuh ba bun ki shnong ba don marjan khappud bad ka ri Bangladesh ki kwah baka jingker sainar kan dei beit na Zero Line namar lada ker palat na kane, ki nongrep khamtam kiba rep kba kin jur bha ka jingshah ktah.
“Ka seng bad ki paidbah nongshong shnong ba kwah ba ka jingker sainar shiah kan dei na Zero Line hynrei lada ym lah ban leh ia kane na ka liang ka sorkar pdeng lyngba ka sorkar jylla kidei ban siew bai lutksan iaki paidbah khamtam ki nongrep” la ong u bah Shaibor.
U bah Shaibor ula ong ba ka seng ha ka dorkhas ba la aiti ha u symbud myntri rangbah ka jylla u bah Prestone Tynsong ka la pynpaw ba ka jingker sainar shiah na ka jingjngai kaba 150 yard na u Zero Line kan wanrah ia ka jingduhnong ha ki jaka ki puta jong ki nongshong shnong kiba ju im kamai jakpoh da ka rep ka riang ha ki shnong kiba don ha khappud jong ka ri India bad ka ri Bangladesh.
Ula ong ba ka jingiakren ka long kaba seisoh namar u symbud myntri rangbah ula kular ban shim khia iaka jingker sainar shiah bad ka jingsiew bai lutksan iaki trai bad ula bthah ruh iaki trai jaka ban pynbiang iaka jingthoh jingtar bad ban phah shaka sorkar naka bynta ban leh iaka ba donkam.
