Shillong, Risaw 21 : Ka Iingkashari Meghalaya High Court hynne ka sngi thohdieng, kala bthah ia ka Harijan Panchayat Committee (HPC) ban jubab ia ka jingtyrwa jong ka Sorkar Jylla ban kynriah ia ki 342 tylli ki Longiing na Them Metor, Them Iew Mawlong hapoh ka saw taiew.
Haba shong bishar ia ka mukotduma, ka Iingboshar Division Bench kala ong ba ka Sorkar Jylla kala dep pyntip ia ka jingtyrwa ha ryngkat bad ka plan ban pynkynriah iaki longiing, ia kaba la phah sha ka HPC lyngba ka shithi ba 30 tarik u Nailur.
“Naba ka HPC kala pynpaw ba ka dang bishar ia ka jingtyrwa, ka kyntu ia ka HPC ban ai jubab ia ka jingtyrwa hapoh ka saw taiew . Ai ba kane ka kam kan wan biang sha ka jingbishar hadien arbnai” ong ka Iingkashari.
Ka Iingkashari kala buh ban shong bishar biang ia kane ka kam ha ka 16 tarik u Rymphang.
Ha ka 29 tarik Nailur, ka Sorkar Jylla kala aiti ia ka plan sha ka HPC ha ka jingialang, kaba pynpaw ia ka ra ban tei ia ki Iing bun mala ha ka jaka ba don ki quartar ka Shillong Municipal Board (SMB) ban pynkynriah ia ki 342 tylli ki longiing.
Ka Sorkar Jylla kala kyntait mardor ia ka jingtywa jong ka HPC ban ai 200 sq meter ka jaka sha kawei pa kawei ka longiing jong ki 342 tylli ki Iing hapoh ka European Ward bad ban pynlut pynsep ruh ha kaba tei ia ki iing jong ki.
Ha ka jingialang, u Secretary ka HPC u Gurjit Singh ula pynpaw ia ka jingsngewkhia ba ka Sorkar kala kyntait ia ki jingdawa jong ka HPC ba don phra tylli ki mat.
