Shillong Naitung 27: Ka Hynniewtrep Youth Council (HYC) haka 27 tarik u Naitung kala dawa na u Symbud Myntri Rangbah ka jylla u Bah Prestone Tynsong uba khmih ruh iaka tnad bording ba un ai jingpynshai ha kaba iadei bad ka jingoh dor ban pyndait iaki Smart Meter ha ka jylla.
“Kum shi bynta ban weng iaka jingbym shai jong ki paidbah bad ki nongshong shnong ka jylla, ngi dawa na u Symbud Myntri Rangbah ban ai jingpynshai ia ka dor jong ka project na ka bynta ban pyndait bad ban shalan iaki 180000 tylli ki Smart Meters la siew ha ka dor kaba kot T. 232 Klur haba uwei pa uwei u Meter u shongdor tang 3750 katkum ka jingkren hi ka jong u hapoh ka iingdorbar thawain ka jylla” la pynpaw u General Secretary ka HYC u Bah Roykupar Synrem.
Ka HYC kala dawa ruh ba dei ban ai jingkhein ba ha kano ka dur ka jingleh iaka installation, testing bad kiwei kiwei ki kam kiba iadei bad u Smart Meter la ai haka dor T.9191 haba ka dor jong u Meter ka long tang T. 3750.
U la pynpaw, ba ha ka por ba u James Sangma u dang long u Myntri ka tnad Bording u la kren haka iing dorbar thawain ka jylla haka 11 tarik u Lber 2021 ba ka dor jong uwei u smart meter ka long kumba T.3400 katba u Symbud Myntri Rangbah ha ka 17 tarik u Lber 2022 u la jubab ba ka dor jong ka Single Phase bad Three Phase Smart Meters ka long T.3750 bad T.5120 khlem ka GST, kumjuh iaka jingshalan bad jingpyndait ia ki 180000 tylli ki meter haka jylla.
U Roykupar Synrem u la pyntip ba katkum ka jubab lyngbaka RTI, la shem ba ka jingialang jongka Board of Directors jongka MPDCL kaba la long haka 12 tarik u Rymphang 2021 kala ai jingmynjur iaka dor kaba la tyrwa da ka JV of Satnam Global kata T.195,34,84,189 (khlem ka Tax & Provisional Sum) bad T. 232,96,39,343 ryngkat bad ka GST bad Provisional Sum kata uwei u meter ryngkat bad ka jingpyndait.
La ai iaka LOA haka 16 tarik u Rymphang 2021 katkum ka dor jong ka kontrak ryngkat bad ka jingphiah kata : Ex Works Price Components T. 1714842495 kaba la long kumba T. 9526 uwei u meter, GST Component T.308671649 kaba long kumba T.1715 uwei u meter, Installation Price Component ka long T. 259428135 kaba kot kumba T.1441 uwei u meter bad GST Component on Installation T. 46697065 kaba long kumba T.259.
“Ka kontrak baroh ka long T. 2329639344 bad lada khein bha ka dor jong ka jingshalan bad jingpyndait ia uwei u smart meter ka long T.12,941, katba ka dor jong ka Installation, Testing bad jingpyntreikam ia uwei u smart meter ka long 12941- 3750 = T.9191 kaba long arshah ia ka dor jongka jingthied. Kam long klaba shai, ba ha ka no ka dur ki Myntri Sorkar kila ai ia katei ka jubab haneng haba ka jingkhein jingdiah jong ka dor jong ka projek ka pyni ba ka dor jong ka jingshalan bad jingpyndait ia uwei u meter ka long T.12,941 bad ka GST,” ong u General Secretary ka HYC.
U la pyntip ba katkum ka jinglap na ka RTI la pynpaw ba ka dor jong ka jingpynbiang bad Sim Card jong u Smart Meter yn hap ban pynlut da ki paidbah kiba pyndonkam haba kut jong ka ar snem. Ka HYC ka sngew ba kane kan buh ha ka jingeh ia kiba pyndonkam ia ku Smart Meter khamtam eh ia kiti kiba sah ha ki thaiñ nongkyndong.
U Bah Roykupar u la ong, katkum ka RTI la shem ruh ba ka East bad West Garo Hills Distribution Circles kidei ki Circles kaba jur bha ka jingduhnong jong ka AT&C kaba kot sha ka 75.34% bad 60.72 %.
“Ngi iengskhem haka jingdawa ka jong ngi naduh ba sdang, ba ka sorkar jylla kadei ban sdang pyndait iaki Smart Meter ha kitei ki ar tylli ki circle kum ka
Pilot Project bad lada jingtreikam ka long kaba seisoh dei ban pyniar sha kiwei pat ki Circles kaba ka jur bhaka jingduhnong jong ka AT&C”.
Ka HYC kala dawa ruh naka MePDCL ba kadei ban pynlong ia ki prokram ban pynsngewthuh ia ki paidbah halor ka jingmyntoi bad jingduhnong ha ka jingpyndait ia ki Smart Meter.
