Shillong, Nailur 16 : Ka Kynhun Myntri ka Sorkar Jylla ha ka sngi Ba-ar kala ai jingmynjur ia ka jing thungkam pura ba shisien leh ia 11 ngut ki Lady Supervisor ha ka Tnad Social Welfare, ong u Myntri Rangbah Conrad K Sangma.
U iathuh ba ia kane ka jingthungkam pura la leh haba pyntrekam ia ka hukum jong ka Iingkashari.
U Conrad u iathuh ba kane ka kam haba sdang la rai da ka High Court bad hadien la tynjuh pyrshah da ka Sorkar hapoh ka Division Bench bad hadien pat hapoh ka Supreme Court.
“Ka Supreme Court kala ai ia ka hukum ban thungkam pura shisien thung. Ka hukum kala kdew kyrteng ba ym dei ban bud kum ka nuksa hadien habud bad kan treikam tang ha kane ka khep ba mynta” ong u Myntri Rangbah hadien ba pyniaid ia ka jingialang.
