Shillong, Nailur 16 : U Myntri Rangbah ka Jylla Conrad K Sangma ha ka sngi Ba-ar ula pynbna ba ka Sorkar kan pynkha ia ka Civil Aviation Wing hapoh ka tnad Transport ka ban khmih ia ka jingpynheh ka Jylla ia ka kam pyniasoh liengsuin.
Ia kane ka rai la shim ha ka jingialang jong ka Kynhun Myntri ba long ha ka sngi ba-ar.
U Conrad ula ong ba ka Jylla kala sakhi ia ka jingnang kiew ki jingtei kad liengsuin, kynthup ka jingpynjrong ia ka runway ka Umroi Airport, pynim ia ka Baljek Airport bad ka jingshna ia ki heliport.
U ong ba kine ki project,ryngkat bad ki jingthmu ban sdang ia ka helicopter tourism, ki donkam ia ka jingphaikhmat kyrpang jong ka Sorkar.
“Ka kam liengsuin ka dei ka kam kaba iar bha kaba donkam ia ka jingiatreilang kaba jan bad ka Sorkar Pdeng lem bad kiwei ki bor treikam. Ia mynta, ngim pat don ia uno uno u Ophisar bad u Commissioner & Secretary ki ban khmih ia kane ka kam nalor kiwei kiwei ki kam” ula ong.
Kat kum ka jingong u Myntri Rangbah, kane ka Cell ba thymmai kan don iaki Nongtrei bala thung kyrteng ki ban khmih beit tang ia ki kam liengsuin.
Halor ki heliport, u Conrad u iathuh ba ka Shillong bad Tura ki dei kiba la dep ban mang pisa bad ki kam kiba iaid ruh ha ki lai haduh saw tylli ki jaka, kawei kan dei ha Sohra, ban pynkhlain ia ki lad pyniasoh bad ka kam jngohkai.
