Shillong, Nailur 16: Ka Confederation of Meghalaya Social Organizations (CoMSO) kala pyrshah jur ban pyntreikam salonsar ia ka Uniform Civil Code (UCC) ha Meghalaya bad dawa ba dei ban pynlong shwa ia ka jingiasyllok katkum ka riti synshar ka ri hashwa ban shim ia kano kano ka sienjam.
Ha ka dorkhas kaba la phah sha u Myntri Kam Pohiing ka ri u Amit Shah bad u Myntri Rangbah ka Jylla u Conrad K Sangma, ka CoMSO kala pan jingpynshai la ka jylla Meghalaya la kynthup lang ha katei ka jingthmu ban sdang pyntreikam ia ka UCC ha ki Jylla kiba la synshar da ka NDA hapoh u snem 2029 bad ha ki rukom treikam kiba kumno jong ka riti synshar ka ri yn pyntreikam ha ki jylla bad ha ki Autonomous District Council.
Ka CoMSO kala pynkynmaw ia ka Sorkar Pdeng ba ka Meghalaya ka don ia ka jingiada kyrpang jong ka riti synshar ka ri hapoh jongka Article 244(2) ryngkat bad ka Sixth Schedule.
“Ka Khasi Hills, Jaintia Hills bad Garo Hills Autonomous District Council kidei kiba la ioh jingithuh kyrpang ryngkat bad ka jingioh ia ka bor ban khmih halor ka jinghiar pateng, shongkurim, jingpyllait san shyieng bad ki riti dustur tynrai” la ong ka CoMSO bad ka buh jingkylli kumno ka UCC kan leh ha kaba iadei bad kitei ki bynta khlem da shimkhia ia ki lad ban ai jingiada.
Ka CoMSO kala dawa ba dei ban khmih bniah shwa ia ka Paragraph 12A jongka Sixth Schedule ha kaba iadei bad ka jingpyntreikam ia ki ain jong ka Parliament ha ki Autonomous District.
Kala ong ba ka riti dustur tynrai jong ki jaidbynriew Khasi, Jaintia bad Garo ha kaba iadei bad ka shongkha shongman, jingpyllait san shyieng, jinghiar pateng bad ka jingioh pateng, ka Kur bad ka rukom shim jait kidei ki bynta jong ka jinglong tynrai kyrpang ka jylla bad ka pynpaw ba ka jylla Meghalaya kadei kaba shim jait na ka kmie kaba kha.
Ka CoMSO kala dawa ba dei ban don ia ka jingiasyllok kaba iar bha kaban kynthup ia ki 3 tylli ki Autonomous District Council, ka Sorkar Jylla, ki Khlieh Nongsynshar, Dorbar Shnong bad kiwei kiwei kiba donbynta lang.
“Ym lah ban shim ba ka Meghalaya ka long kum kiwei pat ki jylla haba ki kyndon jong ka riti synshar ka ri ki don bad kila ai jingithuh kyrpang bad iada ia ka jinglong tynrai kaba kyrpang ia ka synshar khddar tynrai bad ia ki riti dustur” la ong u Chairman ka CoMSO u Bah Roy Kupar Synrem.
“Ka jingiadei ha ki kam sain pyrthei kam lah pat ban iaid lait ia ka Sixth Schedule. Ki kam sain pyrthei kim lah ban shu poi shaduh u pud ban iaid lait ha kaba iadei bad ka jingioh jingiada ka Meghalaya na ka riti synshar ka ri”.
Ka CoMSO kala dawa ba ia ka jylla Meghalaya dei ban buh sharud na kano kano ka jingpyntreikam salonsar katba ia ki jingkylli kiba iadei bad ka rukom treikam jong ka riti synshar ka ri ym pat khmih bniah bad ban tyrwa ba dei ban don da ka
Constitutional and Customary Law Review Committee ban khmih bniah ia ka jingshah ktah jong ka jylla Meghalaya.
“Ka jingpyntreikam salonsar ha ka kam sain pyrthei kam lah pat ban iaid lait ia ki jingiada kiba ioh na ka riti synshar ka ri. Ka jingpynsuk ban don ka jingtreikam kaba ryntih kam lah ban iaid lait ia ki jaka synshar khaddar tynrai bad ka jingpyntreikam ryntih kam lah ban pynjari da kaba ktah jur ia ka jinglong tynrai ka Meghalaya” la ong ka CoMSO.
Kala kyntu ia ka Sorkar Pdeng ban sdang noh ia ka jingiakren bad jingiasyllok katkum ka riti synshar ka ri bad ka sorkar jylla, ki 3 tylli ki ADC bad ki Khlieh Nongsynshar hashwa ban shim ia kino kino ki sienjam ban pyntreikam ia ka UCC ha Meghalaya.
