Nongpoh, Naitung 27: Ka Synjuk ki Rangbah Shnong ka Ri-Bhoi District kila dawa ia ka Tnad Meghalaya Energy Corporation Limited (MeECL) ba kan pynbiang noh ia ka jingsam bording sha ki 10 tylli ki Shnong ka thain Mawrong lem kumta ki Nongshongshnong kane ka thain ki lah ban mih paidbah ban iakhin pyrshah ia ka Corporation.
Ia kane ka jingdawa bad jingpyntip la buh hakhmat u Assistant Engineer ka Umsning Distribution Sub Division ka MePDCL, Umsning ha ka jingleit iakynduh jong ka Synjuk hynne ka sngi balang bala lamkhmat da u Bah BB Makdoh kum u Chairman.
Haba kren bad ki Nongthoh Khubor, u Bah Makdoh, u la pynrem jur ïa ka jingleh shilliang ki bor ba dei peit ïa ka MeCEL Umsning halor ka jingbym sam bording kaba tikna sha kine ki 10 shnong.
“Ki paidbah nongshong jong kane ka thain ki lah ban ïoh ïa ka bording tang katto katne sngi ha ka shitaïew bad bunsien ki paidbah ki hap ban shongdum bad mad ïa ki jingeh kiba har rukom” ula iathuh.
U Bah Makdoh u pyntip ba kine ki 10 Shnong ki long kiba thikna bha ha ka jingsiew ia ka bai bording ba ki pyndonkam hynrei kane ka jingsiew ka shu long pynban tang ka jingpynsyrwa kai ia ka pisa khlem da ioh bording.
“Kaba sngewkhia ka long ba ki bor ka tnat MeCEL kim shem la patiaw satia ïa ka jingud jing nam ki paidbah katei ka thaiñ kaba na ka por sha ka por “ ula ong.
Kum u Chairman ka Synjuk u Bah Mawthoh ula pyntip ba kine ki 10 tylli ki Shnong kila byrngem ban iakhih paidbah noh lad aka MePDCL kam lah satia ban ai thikna noh ia ka bording manla ka sngi kumba ioh lang kiwei kiwei ki jaka.
