SHILLONG, Risaw 14: Ki dkhot ka seng Hynniewtrep Integrated Territorial Organization (HITO) hynne ka sngi kila leit ban buh syntiew ha khyrdop secretariat, ha jaka sah u Myntri Rangbah ka jylla, ha ophis treikam ka Bharatiya Janata Party (BJP), United Democratic Party (UDP) bad haka ophis ka National People’s Party (NPP).
Haba kren ha kane ka sngi u president ka HITO u bah Donbok Dkhar ula ong ba nyngkong naka liang ki bor district kila khang iaki dkhot ban iaid na Mot Kiang Nangbah bad ban leit buh syntiew hynrei hadien ka jingiakren ki bor district kila shah iaki dkhot ban iaid.
U bah Donbok ula ong ba kane ka jingleit buh syntiew kadei ban pynrem halor ka jingslem ka sorkar ban wengkam ia 2 ngut ki heh pulit kiba donkti ban kawang bom pynsat khmat iaki nonghikai ki ba dang iakhih haka 6 tarik mynta u bnai.
Ha kane ka sngi naka liang u president ki nonghikai kontrak u bah Birbor Riangtem bad kiwei ki nonghikai ruh kila wan shim bynta ban leit buh syntiew.
