Shillong, Risaw 13 : Ka Iingkashari Meghalaya High Court hynne ka sngi palei kala bthah ia ka Khasi Hills Autonomous District Council (KHADC) bad u Syiem ka Hima Mylliem ban pynlong ia ka jingiasyllok ha kaban pynkohnguh ia ki shnong ki thaw ba kin ailad lang ia ki Kynthei ba ki iashimbynta ha ka jingjied kam Rangbah Shnong.
Haba shong bishar ia ka mukotduma bala mudui da I Kong Aneeta Synrem, ka Division Bench kala ong “ Na ki sakhi kiba la ai da ka KHADC ba Syiem ka Hima Mylliem, naba bun ki shnong kila jied ban iaid lait ia ka kyndon ba khang ia ki kyntei ha ka kam jied Rangbah Shnong, ka long kaba biang eh ia ka KHADC bad ka Hima Mylliem ban pynlongia ka jingiasyllok bad ki Shnong ki Thaw ba kin shah noh ia ki Kynthei ba kin iashimbynta ha ka kam jied Rangbah Shnong”.
Ka Iingkashari kala pynpaw ruh ba ka sngew ktah jur ba ka KHADC ba u Syiem ka Hima Mylliem ki ap ia ka jingai jingmut jong ka Iingkashari ban pynlong ia ka jingiasyllok halor kane ka kam ban pynthikna la kala ai ne em ia kajuh ka hok ia ki Kynthei ha ka jingjied ia ki Rangbah Shnong.
“La kyrmen ba ha ka sien shong bishar ban wan ha kine ki phra bnai ban wan, ka KHADC bad u Syiem ka Hima Mylliem kin don eiei ban pynpaw khang ba ka Iingkashari kam donkam ban ai rai halor kane ka kam”kala ong.
Kane ka mukotduma ka iadei bad ki ain jong ki District Council bad ki Rule ki bym shah ia ki kynthei ban tyrwa ialade ban iakhun kum ki kyrtong sha ka kam Rangbah Shnong lane iashimbynta ha ka jingjied ia ki Rangbah Shnong.
Ka ain kaba mih dak jingkylli ka dei ka Khasi Hills Autonomous District (Appointment and succession of Syiem, Deputy Syiem, Electors and Rangbah Shnong of Mylliem Syiemship) Act, 2007.
Ka Iingkashari kala buh ban shong bishar biang ia kane ka mukotduma ha ka 13 tarik u Nohprah.
