Shillong, Nailar 24 : Ka seng Khasi Students’ Union (KSU) kan sa shim ia ka rai halor ka jing khot iakren ka Sorkar lashai ka sngi ka 25 tarik Nailar ha ka jingialang ba kyrkieh jong ka Central Executive Committee (CEC), ong u Assistant General Secretary ka seng samla Pynshaiborlang Rani.
Ka Sorkar kala khot ia ka KSU ban wan sha ka jingiakren halor ki 5 tylli ki mat jingdawa hadien ki huri hura kiba mih ha kine ki khyndiat sngi bala leit.
U Myntri Rangbah Conrad K Sangma ula pynbna ba ka Sorkar ka long kaba kloi ban pynlong ia ka jingiakren bad kala dep ruh ban phah ia ka shithi sha ka KSU.
U Samla Pynshai ula iathuh ba ka Seng kala ioh jingtip halor kane ka jingkhot iakren na ki lad pathai khubpor ha ka step sngi Nyngkong bad hadien kala ioh pdiang ia ka shithi hapdeng ka por11 baje bad 12 baje mynsngi.
Ula pyntip ba ka jingpynlong ia ka CEC ha ka sngi Nyngkong hi ka long kaba eh namar ba hap ban khot ia ki nongialam na kylleng ka District.
“Kumta, ka long kaba eh ban khot ia ka jingialang jong ka CEC namar ha ka seng jong ngi, ngi don ia ki nongialam na ki district bapher bapher-West Khasi Hills, South West Khasi Hills, East Jaintia Hills, West Jaintia Hills bad Ri-Bhoi. Na kata ka daw, lashai ka sngi ngin lum ia ka jingialang ba kyrkieh ka CEC ha kaba ngin sa shim ia ka rai halor kane ka shithi kaba phah da ka Sorkar ba khot iakren ia ka KSU” ong u samla Pynshai.
Shuwa kane, ka KSU hynne ka sngi kala pynlong ia ka jingialang pynher ehrngiew ia ka lama bad jingduwai phirat hapoh ka Ophis treikam ha Jaiaw ha ka jingiadonlang ki nongialam barim/
Ia kane la leh kum shibynta ban pyneh rngiew ia ka seng hadien ka jingshah wan khynra bad pynjulor ki Pulit ha ka miet 19 tarik Nailar.
“Ka seng ha ryngkat ki nongialam barim kila pynlong ia ka jingialang pynher ehrngiew ia ka lama hapoh ka Ophis treikam ha Jaiaw hadien ka jingkhynra jong ki Pulit ia ka Ophis ha ka miet 19 tarik Nailar. Ka seng kala pynlong ia kane ka jingialang kum shibynta ban pyneh rngiew ia ka seng baroh kawei bad kala don ruh ka jingduwai phirat halor kane ka bynta” ong u samla Pynshai.
 kan sa shim ia ka rai halor ka jing khot iakren ka Sorkar lashai ka sngi ka 25 tarik Nailar ha ka jingialang ba kyrkieh jong ka Central Executive Committee (CEC), ong u Assistant General Secretary ka seng samla Pynshaiborlang Rani.){kind=link}