Shillong, Nailar 24 : Ka Iingkashari Meghalaya High Court kala shimkhia ia ka jingshah thombor ki artylli ki kali ka Iingkashari bad ka jingshah shoh u PSO bad u Nongniah ha ki kam thombor ba jia ha ka rally ka KSU ha ka 19 tarik Nailar.
Haba shong bishar ia ka PIL ha ka sngi Nyngkong, ka division bench u Justice HS Thangkhiew bad Justice W Diengdoh, kala bishar bniah ia ka kaiphod bala aiti da ka Jylla kat kum ka hukum ba pynmih ha ka 20 tarik Nailar.
U Advocate General A Kumar ula pyntip ia ka Iingkashari halor ki sienjam bala shim, kynthup ka jingthung ia ka kynhun Special Investigation Team (SIT) ban pynsted ia ka jingtohkit halor ki jingjia ba jia ha ka 19 tarik Nailar, bad ban aiti ia ki jingtip ba bniah jong ki case bala register halor ki kam pynjulor nongkynti bad shoh briew.
Ka iingkashari kala pynpaw ba ka jingtohkit la iohi ba kala iaid shakhmat hynrei lait na ka jingkem ia ki nongkitkam, ym shym la don shuh ka jingkem iano iano ruh.
“Ka Iingkashari ka pynpaw ruh ba ha kine ki jingjia, 2 tylli ki kali jong ka Meghalaya High Court, ha ka jingdonlang ki Ophisar, kiba shah thombor bad ki briew, kynthup ia u PSO bad u nongniah kila shah shoh. Haba iadei bad kine ki case kaba paw ha ka SL No 7 & 8, ki liang mamla ka Jylla ki dei ban aiti ia ka case diary” ong ka hukum.
Ka Iingkashari kala bthah ruh ba dei ban pyrkhat ha kaban pynsted kumjuh ia baroh ki case, kynthup ka jingthombor ia ka bos kamai paidbah.
Haba buh bishar biang ia ka kam ha ka 1 tarik Nailur, ka iingkashari kala bthah ia ka Jylla ban aiti ia ka kaiphod thymmai kat kum ka jing jingiaid ka kam bad ban aiti ia ki case diary, haba shim ba ka jingtohkit ka dei kaba dang shu sdang.
