Guwahati, Risaw 30: Ka sorkar Assam ka la pynjur ïa ka jingpeitngor ha ki jaka ba lah ban shah ktah ha ki distrik Dhubri bad Kokrajhar hadien ba mih ki khubor ba don ka jingbthei ka pung thah ne glacial lake outburst flood (GLOF) ha ki bynta ba marjan bad ka Bhutan, ha kaba la buh ia ka NDRF ha ka jingpynkhreh ban ïakhun ïa kino kino ki jingktah kiba lah ban jia.
U Myntri Rangbah ka jylla u Himanta Biswa Sarma u la ong ba ki bor pyniaid ka jylla ki dang bishar bniah ïa ka jinglong jingman bad buddien ïa ki jaka ha ki ar tylli ki district.
Katkum u Myntri Rangbah ka Jylla, ki kynhun ba dei peit ia ki jingjia ba sngewsih jong ki jylla ki don ha ka jingiatreilang kaba man ka por bad ka National Disaster Response Force (NDRF) bad kiwei kiwei ki tnad kiba iarap haba jia kyrkieh.La pyntip ia ki kynhun ai jingiarap bad la buh ia ki ha ka jingpynkhreh ban pyntreikam stet lada ka jingkiew jong ka um ne kiwei kiwei ki jingjia ba kyrkieh ki donkam ban iarap.
La bthah ruh ïa ki bor pyniaid district ha Dhubri bad Kokrajhar ba kin buddien bha ïa ki rukom long rukom man jong ki wah bad ki jaka ba lah ban shlei um khnang ban bishar bniah ïa ki jingma kiba lah ban mih.
La bthah ia ki nongshong shnong kiba sah harud wah bad ha ki jaka ba lah ban shah ktah ba kin long kiba husiar, ban bud ia ki jingbthah jong ki bor sorkar bad ban iatreilang bad ki bor synshar shnong.
Ka sorkar jylla ka dang buddien bha ïa ka jinglong jingman, ha kaba la khmih lynti ïa ki jingpynbna ba kham bniah katba ki bor synshar ki dang bishar bniah ïa ka jingktah kaba lah ban mih na ka jingbthei jong ka glacial lake jong ka Bhutan ha ki jaka ba shapoh jong ka Assam.
