Shillong, Iaiong 29 : U Deputy Commissioner ka East Khasi Hills SC Sadhu, un sa shong jingialang lashai ka sngi Ba-ar bad ki bor khmih ka Shillong Contonment Board (SCB) haba iadei bad ki Iing kiba sah be-ain ha Lum Survey.
Ia kane la pyntip da u President ka Hynniewtrep Youth Council (HYC) samla Roykupar Synrem hadien ka jingialang bad u Symbud Myntri Rangbah ba khmih ia ka Tnad Pohiing (Police) Bah Prestone Tynsong hynne ka sngi Nyngkong.
“La pyntip ia ngi ba u DC un sa shong jingialang bad ki nongmihkhmat na ka SCB halor kane ka kam lashai ka sngi” ong u samla Roykupar.
Haba aiti ia ka dorkhas sha u Bah Prestone ba un tuklar lem halor kane ka kam, une u Nongialam ka HYC ula ong “Ngi dawa ba ki bor ba dei khmih hapoh ka Sorkar Jylla ba kan leh eiei mardor ha kaban kyndang ia kine ki nongshong beain bad ban pynpra ruh ia ki iing kham kloi kat kaba lah”.
Ula pyntip ba ha ka 25 tarik Iaiong, ka HYC kala pynlong ia ka jingeit jurip halor ka jingdon jong kine ki nongshongbeain ha ka jaka ba don pyrshah ka Fire & Emergency Station, Iewduh, Shillong hadien ka jingioh pdiang ia ki jingujor na kiba bun ki riew paidbah.
“Ha ka jingjurip, ngi la shem ba kumba 80-100 tylli ki Longiing kila sah ha kane ka jaka da kaba shna ia ki Iing bala pyndonkam da ki plastic bad ki tiar lyngkot lyngkhai bad ha ka jingtohkit,la shem ba kine ki briew kila sah beain khlem da ioh jingbit na ka Cantonment Board, Shillong Municipal Board lane kino kino ki bor khmih” ula ong.
 haba iadei bad ki Iing kiba sah be-ain ha Lum Survey.){kind=link}