Shillong, Iaiong 29: Ka Jaiñtia National Council (JNC) kala dawa na u Symbud Myntri Rangbah ka Jylla Bah Prestone Tynsong ban weng noh iaka khyrdop ki shipai Border Security Force (BSF) na ka shnong Sonapyrdi, East Jaintia Hills.
Ka JNC kala buh ia kane ka jingdawa halor ka jingkynnoh ba ki shipai BSF ki ju pyndik manla ka por iaki paidbah ka thain kiba hap iaid lynti na kane ka jaka ba ki ieng pahara ha jingkieng Sonapyrdi.
Haba kren sha ki lad pathai khubor u president ka JNC u samla Sambormi Lyngdoh u la ong “Ka jingdon jong ki BSF ha katei ka jaka ka long pynban ka jingpynthud ia ki nongshong shnong, namar lada ki briew ki wan iew kum na Khliehriat lane na Lum Shnong, ki ju shah pyndik ha kine ki BSF”.
U samla Sambormi u la ong ruh ba ka jingbuh ia ki BSF ha Sonapyrdi ka dei ka bym don jingmut satia namar ka East Jaiñtia Hills kam dei ka jaka ba bun ki lehnoh hynrei kadei ka thain kaba shongsuk shongsaiñ.
“Ka seng ka kwah bad ka kyntu iaka Sorkar Jylla ban kan phah iaki shipai BSF skhappud ban pynkhlain ban talasi iaki poi wir kiba wan na Bangladesh khamtam mynta bala trekam ka CAA bad haka juh ka por ban iada ia u pud u sam ka Jylla bad ka Ri” ula ong.
Haba kylli, u President ka JNC ula pyntip ba naka liang u Symbud Myntri Rangbah ka Jylla ula pyntip baka Sorkar Jylla kala ai jingmut iaka ophis Deputy Commissioner (DC) ban thaw daka District Co-ordination Committee haka jingdon lang ki heh BSF, ki Rangbah Shnong ban khmih iaka bha ka miat ki paidbah haki thain khappud.
