Imphal, Nailar 27: Ki bor pulit ka Manipur kila lapdien ia kawei ka jaka shna tiar siat beain ba kongsan ha Churachandpur district ka Manipur.
Ka jinglapdien ia kane ka jaka shna tiar siat ha Chrachandpur district ka Manipur la ngeit ruh ba ka dei ka jaka kaba ju pynpoi ia ki tiar siat sha ki kynhun seng lehnoh.
Na ka liang ki bor pulit ka Manipur ha ryngkat ki shipai BSF ryngkat lang kila pynlong ka jingleit khynra ia katei ka jaka shna tiar siat kaba don hapoh ka Shiamtund ha ki bynta jong ka New Lamka. Na kane ka jaka ki pulit kila ioh ban kurup shibun bah ki tiar siat.
Hynrei, watla katta u briew uba la shah kynnoh donkti hakhmat eh, kata uba ia kane ka iingsah jong u la pynkylla kum ka jaka shna tiar siat ula ioh ban phet krad noh na katei ka jaka. Na ka liang ki pulit kila pynlong ka jingbehthong ban ioh kem ia une u briew.
“Ha ka jingleit khynra da ki bor pulit ka district ryngkat ki shipai BSF, la lapdien ia kawei ka jaka shna tiar siat ha New Lamka, Churachandpur. Ha kane ka jingleit khynra la ioh ban kurup ia shibun bah ki tiar ba la pyndonkam ha kaban shna suloi,” ong u Myntri Rangbah (CM) ka Manipur, u Biren Singh.
