Kohima, Nailar 27 : Ka jylla Nagaland kala ioh ia ka steshon rel kaba ar jong ka ha lynter ka lynti rel Dhansari-Shokhuvi hadien kumba 100 snem mynta. Ia ka steshon rel ha Dimapur, Nagaland la plie naduh ka snem 1903.
Na ka liang u Myntri Rangbah (CM) ka Nagaland, u Neiphiu Rio ula kaweh ia ka lama na ka bynta ka jingpyniaid ia ka rel Donyi Polo Express lyngba ka Shokhuvi Railway Station hynnin ka sngi Thohdieng.
Da kaba pynpaw ia kane ka sngi kum ka sngi sah jingkynmaw, u CM ka Nagaland ula ong “Ka sngi sah kynmaw” na ka bynta ka jylla, bad ka jingkhublei ka leit sha ki ophisar, ki enjiniar bad ki staff jong ka Northeast Frontier Railways (NFR) halor ka jingpynurlong ia kane ka jingphohsniew jong ka jylla Nagaland.
U la ong ruh ba ka jingai jingshakri na ka bynta ki paidbah bad ki jaka buh mar lyngba kane ka Shokhuvi station kan lah ban pynbiang halor ki jingdonkam jong ka jylla.
“Ka jingshakri lyngba ki rel ka dei kaba ar ka jingduna ha kaba iadei bad ka leit ka wan bad kumta ruh kane kan wanrah ka jingkylla ha ka jylla ka jong ngi bad ha ka liang ka ioh ka kot,” ong shuh shuh u Rio.
Shuh shuh ula pynpaw ruh ka jingkyrmen ba ia ka Molvom Station yn sa lah ban pyndep noh ha u bnai Lber ne u Iaiong 2023.
