Itanagar, Nailar 27: Ka China la ong ba kala pyniaid shakhmat ha kaba iadei bad ki jingtei ki jong ka hajan ki bynta khappud bad ka India ha ki bynta jong ka Arunachal Pradesh.
Ka tnat shipai People’s Liberation Army (PLA) ka China la iathuh ba kila bunkam ha ka ba pyntrei ia ka surok na ka bynta ban shna ia ka jaka pynieng liengsuin hajan Chaglagam kaba hapoh Anjaw district ka Arunachal Pradesh.
Katkum ka kaiphot, kane ka jaka ba pyntrei ia kane ka projek ka dei kaba la tip kum ka Hadigara, Delta-6.
Ki dur ki dar kiba pynshisha halor kane ka jingpyntrei kila sdang ruh ban saphriang lyngba ki social media, ha kaba la iohi ia ki jingtei kiba heh kiba don markhap bad ki jaka khappud ka India.
Kham hashwa, ha u bnai Naiwieng 2021, la ong ba ka China kala tei haduh kumba 60 tylli ki iing ha ki bynta jong ka Arunachal Pradesh.
Kumjuh ha u bnai Nohprah 2021, ka China kala pynthymmai ia ki kyrteng jong ki 15 tylli ki jaka, kaba kynthup ia ki jaka shong shnong, ki jaka lum, ki wah bad ki lynti iaid ha ki thain jaka lum kiba don ha ka jylla Arunachal Pradesh, ia kiba kala kam ba kidei ki bynta jong ka China ia kaba la tip kum ka ‘South Tibet’.
Ka India bad ka China kila ngat ha ka jingiakynad ha ki thain khappud ha ki bynta shatei ka Ladakh sector jong u LAC naduh u bnai Jymmang 2020.
