Guwahati, Nailur 14 : Ia ka metiap jong u Assistant Sub-Inspector (ASI) ka tnat Crime Investigation Department (CID) la lapdien napoh kawei ka hotel ha ka nongbah Guwahati hynnin ka step sngi ba Ar.
Ia ka metiap jong une u heh CID ba la tip kyrteng kum u Nirmal Bhuyan la lapdien hapoh Hotel Bhagaban ha ki bynta jong ka sorbah Bora.
Katkum ki tyllong khubor, u Bhuyan ula sah hapoh kane ka hotel ha ka kamra 201 naduh kine ki saw bnai ba la dep.Ia ka daw jong ka jingiap ym pat lah ban pynthikna.
Ki nongtrei jong ka hotel kila pyntip ba u Bhuyan ula iakynduh ia ki katto katne ki briew kiba la wan jngoh ia u hapdeng kine ki saw bnai hynrei kam shym la don satia kano kano ka jingpher. “La iohi khatduh eh ia une u heh pulit ha ka jan miet sngi U Blei ba la lah da uwei u nongtrei jong ka hotel.”
Ha kawei pat ka bynta, na ka liang kiba haiing hasem jong u Bhuyan ki suba jur ba u lah ban iap namar ka jingkyrni dih kyia namar u dei ruh uba la dep shah pud na ka jingpang klongsnam ha kine ki khyndiat snem ba la dep.
Na ka liang ka kurim jong u kala pyntip ba ula shong la sah jngai na la iing mynta lah kumba katto katne snem namar ka jingiania iamai bad ka.
Na ka liang ki bor pulit ka Paltan kham hadien kila wan poi ha kane ka jaka ban bishar bniah ia ka jinglong jingman.Ka jingtohkit halor kane ka jingjia mynta kala iaid shakhmat.
