Shillong, Nailur 14: U Myntri Rangbah ka Jylla Conrad Kongkal Sangma ula ban jur ba dei ban ailad noh ia baroh 60 ngut ki MLA ba kin kren da ka ktien Khasi bad Garo ha Iingdorbar Thaw Ain, ban phah ia ka khubor sha ka Sorkar Pdeng b aka Jylla ka iengskhem bad ka jingdawa ban pynrung noh ia kine ki ktien ha ka khyrnit ba phra jong ka Riti Synshar ka Ri India.
U Conrad ula buh ia kane ka jingkyrpad ban kren da ka ktien Khasi bad Garo hakhmat u Symbud Lamphang ka Iingdorbar u Timothy D Shira haba jubab ia ka Call Attention Motion bala wanrah da u MLA ka Nongpoh Bah Mayralborn Syiem.
“Sngewbha shah ia ki Dkhot ba kin kren da ka ktien Khasi bad Garo hapoh ka Iing. Ngi la dei ban sdang nangne ban shah pyndonkam ia ki ktien lajong khamtam haba iatai ia ka jingkren maitphang u Lat ka Jylla” ong u Conrad.
“Kane kan long ka khubor sha ka Sorkar India ba ngi iengskhem halor ka jingdawa jong ngi ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri” ula ong haba kyntu ia ki kynhun bapher bapher ba kin phah ia ki jingthoh sha ka Sorkar Pdeng khnang ban lah pynurlong noh ia kane ka jingdawa kaba la slem bha.
U Myntri Rangbah ula pyntip ruh ba ula dep iakren hapoh Iing bad bun ngut ki Nongialam na ka Sorkar India kiba don ha ka bor halor kane ka kam.
“Nga la pynpaw (ha ki) ba kane ka sienjam ban pynthikna b aka jingpynrung ia ka ktien Khasi bad Garo ha ka khyrnit ba phra kam dei satia tang namar ka Ktien jong ki paidriewlum ka Jylla, hynrei ka jingpynrung kan long ruh ka khubor sha ka Sorkar India ba kan burom bad ithuh ia ngi iwei pa iwei” ula ong.
Ka Iingdorbar kala dep ruh ban mynjur ia ka Resolution ba kyrpad ia ka Sorkar Pdeng ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri.
U Myntri Rangbah ula kular ruh ba ka Sorkar kan dang iai bteng ban buddien ia kane ka kam bad ka Sorkar Pdeng ban lah pynithuh noh da ka Riti Synshar ia kine ki ktien jong ki paid riewlum ka Jylla.
Ha kajuh ka por, u Symbud Lamphang ula shah ruh ia u MLA ka Nongpoh ban kren da ka ktien Khasi halor ka jingkyrpad.
U Bah Mayral ula pynpaw ba um don satia ia ka jingartatien ba ka jingiatylli jong baroh ki 60 ngut ki MLA halor kane ka kam, kan long ka jingkyrkhu ia ka Jylla bad ia ki Nongshongshnong.
Une u MLA ula ai khublei ruh ia ka jingnoh synniang jong ki Nongialam barim ka Jylla, ki nongialam jong ki District Council, ki Khlieh Nongsynshar, ka Khasi Author Society bad ka Achik Literature Society halor kane ka kam.
