Guwahati, K’lyngkot 20: Ia kawei ka longkmie na Nepal kaba la jah rngai noh naduh u snem 2018, la lapdien napoh kawei ka jaka shong shipor hapoh Silchar Central Jail ka Assam.
Ia kane ka briew la tip kyrteng kum ka Jannat Khatun kaba la shah kem noh na ki bynta jong ka thain Katigora kaba hapoh Cachar district ka Assam naduh u bnai Naiwieng 2018.
Ha ka sngi ba Ar ba la lah, ka Nepal Consulate ha Kolkata ka la phah da ka shithi sha u Superintendent of Central Jail ha Silchar, da kaba kyntu ban pyllait noh ia ka Khatun kaba dei ka nongshong shnong jong ka Laxmimore kaba hapoh Salahi district ka Nepal, bad ban aiti noh sha u khun jong ka u Firoz Leheri.
U Superintendent of Silchar Central Jail, u Jagadish Deka, u la ong ba ka Khatun ka la pyndep lypa ia ka samoi shong phatok bad ka la don mynta hapdeng ka jingshah sumar hapoh ka hospital.
Katkum ka khubor la ong ba ka Khatun ka la shah kem noh ha u snem 2018 namar ka jingwanrung beain sha u pud u sam ka India.La set ia ka hapoh Silchar Central Jail naduh ka 28 tarik u Naiwieng 2018 bad shong phatok ar snem kynthih bad sa ar snem namar ka jingshang makia hapoh hapoh ka jaka shong shipor.
“I mei jong nga ila ngat ha ka jingmynsaw na ki bynta jong ka khlieh ha u snem 2018.Hadien ka la shah ktah ha ka bor pyrkhat pyrdain bad kawei ka sngi ka la jah rngai noh na la iing.”
“Ngi la wad kylleng hynrei ngim shym la lapdien ia ka. Ngi la pyntip ruh sha ki bor pulit halor kane ka jingjah rngai hapoh Haripur police station kaba don marjan, hynrei kim shym la lapdien shuh ia ka, ” Ong u Feroz.
Ha kawei pat ka liang, u General Secretaey ka Assam’s Citizen’ Rights Preservation Committee (CRPC) ka jylla u Bidhayak Das Purkasyastha u la ong ba ka Khatun ka dei ka briew kaba la shah ktah ha ka bor pyrkhat pyrdain bad ka lah ban dei ka lanot na ki kam shah khaii briew.
