Shillong, Lber 28 : U Myntri ka Tnad Pule Puthi Rakkam A Sangma, hynne ka sngi Ba-ar ula pyntip ha Iingdorbar Thaw Ain ba ka don palat 1600 tylli ki kam Nonghikai kiba lait ha ki skul bapher bapher jong ka Jylla.
Kat kum ka jingong u Myntri,ki don haduh 420 tylli ki kam Nonghikai SSA ba lait bad 1,219 tylli ki kam Nonghikai jong ki skul Sorkar.
Ki kam ba lait jong ki Nonghikai SSA ka dei kaba la phiah ha ki lai bynta ba kynthup ia ka Lower Primary (102), Upper Primary (292) bad ka Secondary (26). Katba ki kam hikai ha ki skul sorkar ki dei kiba la phiah ha ki saw bynta kata ka Lower Primary (1002), Upper Primary (41), Secondary (125) bad ka Higher Secondary (51).
U Myntri ula pyntip ia kane haba jubab ia ka jingkylli bala wanrah da u MLA ka Congress na Mawhati Bah Charles Marngar, ha ka sngi ba khatduh jong ka Dorbar Mang tyngka.
