Shillong, Lber 28 : U MLA ka UDP na Mokaiaw Bah Nujorki Sungoh hynne ka sngi Ba-ar, ula dawa ia ka Sorkar ban pynkynriah noh ia ka Sub Division Number-1 jong ka PWD Shangpung Division Office kaba don ha Jowai.
Haba wanrah ia ka jingkylli bynrap ha Iingdorbar, u Bah Nujorki ula ong “Nga kyrpad ia u Symbud Myntri Rangbah ban khmih ia kane ka kam khnang ba kane ka Sub Division kan wan noh ha ka Constituency jong nga”.
Ula kular ruh ia ka Sorkar ba kan nym don jingeh satia haba iadei bad ka jaka ban pynkynriah ia kane ka Sub Division.
Haba jubab, u Symbud Myntri Rangbah ka Tnad PWD (Roads) Bah Prestone Tynsong ula ong ba ka jingpynkynriah ia ka Sub-Division number-1 ka dang don hapoh ka jingbishar.
Ula ong ba kane ka Sub-Division ka dei kaba khmih ia artylli ki Constituency kata ka Raliang bad ka Mokaiaw Constituency.
