Shillong, Lber 28 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong, hynne ka sngi Ba-ar ula kyntait ia ka jingkynnoh halor ka jingmih ka jaidbynriew riewlum “High Level” haba pyntip ruh ba ka Sorkar kan sa shong bishar ia ka jingbatai bala aiti da ka Tactical Team-I, kaba leit khynra ia ka Iingsah u Nongialam barim ka HNLC (L) Bah Cheristerfield Thangkhiew, kaba lam sha ka jingiap jong u ha ka 13 tarik Nailar 2021.
“Lada phi lah ban sei ia ka sakhi da ka jingthoh hynrei kan shu long tang kaba mih na ki rymmiang shyntur bad ka jingkwah kren pyrshah hynrei ka Sorkar kam pdiang ia kum kine ki jingkren ba ngi donkam ban pynkha sa kawei ka jaidbynriew riewlum ha Meghalaya” ong u Bah Prestone haba jubab ia ka cut motion bala wanrah da ki arngut ki Dkhot ka Liang Pyrshah Bah Ardent M Basaiawmoit (VPP) bad u Dr Celestine Lyngdoh (Congress) ha Iingdorbar Thaw Ain.
Haba pynpaw ba kyntien ‘High level’ ka mih ha ki iew ki hat, u Symbud Myntri ula ong “Ha katei ka por haba nga long u Nongaiktien ka Sorkar MDA, nga ju pynshai da kaba ong balei ba phim wanrah ia kita ki dkhot ka High Level bad balei ba phim ujor ejahar pyrshah ia ki dkhot kata ka High Level”.
Halor ka jinglong jingman jong ka kam ba iadei bad ka jingkynnoh siat iap ia u Bah (L) Cheristerfield Thangkhiew, u Bah Prestone ula ong ba ka Sorkar ka dang shu ioh pdiang ia ki jingbatai na ka kynhun Tactical team-I ha kine ki khyndiat taiew bala leit noh.
“Mynta ka Sorkar kan sa shong bishar (ia ka jingbatai). Kam dei kaba ngi kwah pynslem ia ka kam hynrei ai ba ngan kular ia ki dkhot ka Iing ba kane ka kam ba sahteng kumba la ai jingmut da ka Inquiry Commission, ka Sorkar kan sa shim ia ki sienjam kat kum ka lynti kaba dei” ula bynrap.
Haba iadei bad ka hukum ka Iingkashari Meghalaya High Court ban phah pahara da ka CISF na ka bynta ban tehlakam ia ka jingkhaii tuh ia u dewiong ha Jylla, u Symbud Myntri Rangbah ula ong “Ai ba ngan pynshai ba lada phai sha ka jingtreikam ka tnad Pulit, ngi la lah ban tehlakam. Ngan ym kren than ia ka hukum ka Iingkasahri hynrei ai ba ngan kular ia ka Iing ba ki Pulit jong ngi kila biang lut nadong hadong ban tehlakam ia kiei kiei hapoh ka Jylla Meghalaya”.
U Dr Celestine Lyngdoh haba iashimbynta ha ka jingiatai, ula kyntu ia ka Sorkar Jylla ban ai laitluid ia ki Pulit ba kin treikam bad ban ailad ia ki ba kin trei la ka kam.
Haba iada ia ka Tnad lajong, u Bah Prestone ula ong ba ka Sorkar kala ai ka kti ba laitluid ia ki Pulit ban tehlakam ia kiei kiei baroh la ka dei ka kam bymman lane ka jingshongsuk shongshngain lane ka kam ba iadei bad ka jingshngain ka Jylla haba bynrap ba ka Sorkar kam ju mushlia satia ia ka jingtrei kam jong ki Pulit.
Halor ki jingeh bala pynpaw da ki Pulit, u Symbud Myntri Rangbah ula ong “Ngan sa shong bishar bad ngan sa pule bniah ia kine kiei kiei baroh namar ngi kwah ban ai mynsiem ia ka Tnad Pulit baroh kawei”.
Haba phai sha ka jingtreikam ki Pulit kat kum ka juk ba mynta, u Bah Prestone ula pyntip ba ma u ha ryngkat b aka kynhun jong u, kin sa leit iakynduh ia ki Ophisar ka Ministry of Home Affairs (MHA) hadien ka Dorbar Mang tyngka ban iakren kham bniah ia ki kam ba iadei bad ka jingtreikam ki Pulit kat kum kane ka juk ba mynta.
Haba u Bah Ardent u kwah ban tip mano ba ai hukum ban siat iap ia u Bah (L) Cheristerfield, u Bah Prestone ula ong “Ngi la dep ban pan jingpynshai na ka kynhun. Ia mynta ngam lah ban ong mano ba ai ia ka hukum” haba pynpaw ba ka jingthmu ba nyngkong eh ka long ban kem ia une u nongialam barim jong ka HNLC.
