Shillong, Risaw 18 : Ka Indian National Congress (INC) ka lah ban pynbna kloi ia ka kyrteng jong ki kyrtong ki ban mih aireng ha ka elekshon MLA-2023 ban long ha Jylla.
Haba pyntip ia kane, u President ka Meghalaya Pradesh Congress Committee (MPCC) ma Vincent H Pala ula iathuh ha ki lad pathai khubor ba ka Party kala sdang ia ki kam ban khot thep kyrteng na ki block bapher bapher.
“Ngi la dep sdang ia ki kam bad kan sa kut ha ki pdeng taiew jong u Nohprah bad ngi kyrmen ba shuwa ban kut u Nohprah ngin sa lah ban phah ia ka kyrteng jong ki kyrtong sha Delhi ban ioh jingmynjur. Nga kyrmen ba ha kane ka kynti, ngi pyrshang ban iohi ba ka jingpynbna ia ki kyrtong kan long kloi noh ym ha ka khyllipmat ba khadduh” ula ong.
Haba pynpaw ba ka Congress kan tyrwa ia ki kyrtong kiba “khuid” u ma Pala ula ong “Kane ka long namar ba ki paidbah kila mad haba phai sha ka jingkiew dor ki mar ki mata, ka jinglong ka shongsuk shongsain, haba phai shaka bamsap, haba phai sha ka iohkam iohjam-ka Sorkar MDA kala pheil ha baroh ki liang”.
Watla ka Congress kala mad ia ka jingeh namar baroh ki 17 ngut ki MLA kila phet na ka party, une u Heh ka MPCC ula ong “Khublei shibun ia u Blei, ngi lah don mynta ha u pud ba ngi lah ban iakhun da ka jingsngewskhem ia ka elekshon lyngba ki dur ba thymmai”.
Ula kam ruh ba ki paidbah ka Jylla Meghalaya kila kwah ia ka Congress ba kan wan phai biang naba kila ngiah la kdang ia kane ka sorkar ba mynta.
Haba kylli la ka party kala tyrwa ia u kum u kyrtong CM, u Pala ula ong “ Mano bym kwah ban long Myntri Rangbah ka Jylla lada ai ka lad”.
U ma Vincent un mih ban aireng na Sutnga-Saipung Constituency pyrshah ia u MLA ka AITC ma Shitlang Pale.
