Shillong, Risaw 19 : U President ka Meghalaya Pradesh Congress Committee (MPCC) bad MP ka Shillong Bah Vincent H Pala ha ka sngi Palei, ula ong ba ka Congress kala pynkhreh bha ialade ban mih iakhun ia ka elekshon MP-Lok Sabha bad elekshon MDC ban long ha u snem ban wan.
“Ngi la pynkhreh ban mih iakhun ia ka elekshon la kan long ha u bnai Rymphang lane ha kano kano ka por. Kane kan shong ha ka Sorkar Jylla kumno ba kan leh” ong u bah Pala haba iakren bad ki nongthoh khubor shabar jong ka jingialang ka State Youth Congress Convention bala pynlong da ka MPCC ha Shillong.
Ula ong ba ka party kan sa thoh sha baroh ki Block ba kin pynkloi noh ha kaban phah ia ki jingai jingmut haba phai sha ki kyrtong na ka bynta ka elekshon MDC sha ka IIngdorbar jong ka Khasi Hills Autonomous District Council bad Jaintia Hills Autonomous District Council.
“Ka kam hi kan sdang noh naduh ka sngi Nyngkong. Ha ka jingshisha ka kam ka ju sdang ha u Naiwieng bad ka thup kyrteng kan mih ha u Nohprah bad ngin sa pynbna ia ka kyrteng ki kyrtong hadien bala pynbna ia ka elekshon”ong u Bah Pala haba bynrap ba ka State Election Committee (SEC) bad ka District Election Committee (DEC) kin sa shim rai shen halor ki kyrtong ka elekshon MDC.
Une u Nongialam ka Congress ula ong ruh ba ka rukom pyniaid ia ka jingjied ia ki kyrtong kan long ruh kumjuh na ka bynta ka elekshon Lok Sabha bad MDC.
Halor ka jingkylli ia ki katto katne ki MDC kiba thmu pyniasoh noh sha kiwei ki party, u Bah Pala ula ong “Ngam tip satia ia kane namar u MDC ka Mairang ula wan iashimbynta ha ka jingialang dang shen. Ngam lah ban ong eiei lada don kiba thmu leit pyniasoh sha kiwei ki party namar ym don satia ka ain kyntiap seng ha ki District Counci”.
U Bah Pala ula pyntip ba ki don bun ki nongialam na Ri-lum Khasi Jaintia bad Garo kiba la wan iakren ia ka party bad pynpaw ia ka jingkwah ban iakhun ia ka elekshon MDC na ka Congress.
Une u Nongialam ka Congress ula kam ruh ba ki don ruh ki MLA, kiba lah ban pan ia ka ticket ha ka elekshon ADC bad ong “Ka party kam don jingpyrshah satia ia kane katba ki rule ki dang shah ia ki MLA ba kin iakhun (elekshon ADC)”.
Haba kylli, u Bah Pala ula ong ba ka jingai ticket ia ki kyrtong ban iakhun ia ka elekshon MDC kan shong eh ha ki Block namar kam don satia kano kano ka jingtuklar da ki Nongialam na Delhi.
