Nongstoiñ, Nailar 6: Ka jingpyntrei ïa ka skul pule lane Polytechnic kaba don ha shnong Mawrusyiar Nongstoiñ, ka la shu sahkut noh mynta la jan dap ar snem, na ka daw ka jingleh sting ka sorkar ban siew thikna ia ka pisa sha ki Contractor kiba pyntrei ïa ka building jong katei ka skul pule.
U Bah S.Phrelington Dkhar u ba long u sordar Shnong barim ka Mawrusyiar, u ba dei ruh u rangbah ba la ai sngew bha ïa katei ka jaka sha ka sorkar, u la ong ba naduh u snem 2020, ki ar ngut ki contractor kiba pyntrei ïa katei ka building, ki la sangeh bad katkum ka jingïoh jingtip jong u, na ka liang ka sorkar ka khlem siew thikna ïa ka pisa sha ki.
“Na ka 8 klur 6 lak tam ka pisa ba la mang ban tei ïa katei ka skul pule, ki contractor ki la nang sei na pla mar ar klur ban shna ïa katei ka jingtei bad ka sorkar pat ka la shu nang siew ïa ka running bill sha ki kaba long tang mar 40 lak” ula iathuh.
“Hadien ka jing khang dam ha u snem 2020 ki nongtrei ki la sangeh noh haduh mynta bad ym shim la ïohi dak ei ei shuh ba ki Contractor kin sdang biang ïa ka kam” ula bynrap.
Kat kum ka jingong jong u, ha ka jingshisha ka jingtrei ia kane ka jingtei ka la long haduh 85 % ei ei ba la pyndep bad kaba dang sah ka long satang ban pynbit pynbiang ïa ki jingdonkam kynthup naduh ka bording, ka um bad ka surok.
“Ka jingpynsangeh ka lah ban dei na ka khang dam namar ki nongtrei ruh ki dei kiba na shabar ka Nongstoiñ. Hynrei ka daw ba kongsan hi ka dei ka jingleh sting ka sorkar ban siew thikna. Ban ai daw ïa ki misteri ruh ka long kaba bym shong nia, namar ka sorkar hi ka la dep ban pynbna ban sdang ïa ki kam ki jam kumba dei ban long” ula ong.
Lah ban kdew hangne ba u bah Phrelington Dkhar Sordar jong ka shnong Mawrusyiar, u la ai sngew bha ïa ka jaka ha u snem 2013 da ka jingïa soi soskular ba ka tnad ba dei peit kan pynrung kam ïa kiba haïing hasem jong ki trai khyndew. Ha katei ka juh ka snem la lah ban pyndep ruh ïa ka survey.
Ha u 2014 hadien ka jingmynjur naduh ki bor sorkar, u la lum ïa ka dorbar bad hadien ba la mynjur lang ryngkat bad ka tnad revenue, la pynskhem ïa katei ka jaka ban tei ïa ka Polytechnic. Ka sorkar jylla ha katei ka por ka la mynjur ban mang tyngka haduh 8 klur tam. La khot ïa ka tender bad la aiti sha ki ar ngut ki contractor bad la sdang pyntrei ïa ka jingtrei naduh u snem 2019.
“Kum u nongïalam shnong, nga don ka jingsngewdiaw ba kane ka kam ka la shu sahteng noh kumne. Naduh u snem 2020 haduh mynta ym shym la don shuh mano mano na ki Contractor ban wan trei pyndep. Hooid ym lah ban len ia ka jingdon ka jingkhang dam namar kane ka khlam, hynrei ka sorkar ka la dei ban shimkhia bad peit bniah biang ïa kane ka bynta ba kongsan khnang ba ka kam kan ïaid beit bad ryntih”, ong u Bah Phrelington Dkhar.
“Ma nga bad I kurim, ryngkat ka jingtip ka shnong ngi la ai sngewbha ïa kane ka jaka da ka jingthmu ba kan long ka jingkyrkhu ïa ki samla pule jong ka dong ka thaiñ bad jong ka Jylla hi. Kumta ngim kwah ba kan shu kut noh tang kumne, hynrei ngi angnud ba ka kam kan ïaid beit shakhmat haduh ban da lah ban pyndep kumba la thmu” ula bynrap.
U Bah Phreling ula ong ba kum u nongïalam shnong u don ia ka bynta ban kyntu sha ki bor ba dei peit bad khamtam eh ïa ka sorkar, ba ka dei ban shimkhia ïa kane ka bynta.
“Nga la pyrshang ban ïakren bad ki Contractor, hynrei ki la ong ba ka shong ha ka sorkar ba kan shimkhia ïa kane ka bynta. Ki la ai jingmut ruh ïa nga ba ngan kyrpad da ka jingthoh sha u MLA jong ngi Bah M.Byrsat, ba un shimkhia lem bad na ka liang jong nga ruh, nga la pynkhreh ban ïakynduh kyrpang ïa u, ban kyrpad ba un thaw lad lem ban ioh pyndep noh ia kane ka jingtei na ka bynta ka jingmyntoi jong ki samla ka District jong ngi”, ong u Bah Phrelington Dkhar.
