Guwahati, Jylliew 1: Hynriew ngut ki briew kynthup ia ar ngut ki khynnah rit kila shah kem ha Majuli, Assam ha ka sngi U Blei halor ka jingkynnoh ba ki donkti ban leh beijot ia kawei ka khynnah kynthei kaba dang rit ka rta.
Kitei kiba la shah kynnoh ki dei kiba la tip kyrteng kum u Khagen Doley, u Dharmakanta Pegu, u Jogen Doley, bad u Nathuram Doley bad arngut ki khynnah kiba dang rit ka rta.
Katkum ki khubor, la kynnoh ba kawei ka khynnah kaba dang 12 snem 4 bnai ka la shah pynngop bad shah leh beijot ha kitei ki nongshah kynnoh katba ka dang don marwei ha iing.
Hadien kane ki nongshah kynnoh ki la byrngem pyniap ia ka lada ka pynpaw ia katei ka jingjia shano shano.
Hadien ka jingujor na ka longiing jong ka lanot, ki pulit ki la register case ha Garamur Police Station (case no. 19/2026) bad ki la sdang ruh ia ka jingtohkit halor kane ka kam.
Katkum ka jingong ki pulit, ïa kine ki nongshah kynnoh la pynngat hapoh ki kyndon kiba ïadei bad ka jingshah leh beijot, ka jingthmu, bad ka jingpyntieng pynsmiej, ryngkat bad ki jingpynbeit lypa kiba mut ban ïada ïa ki khynnah rit.
“Ka case no 19/2026 jong ka BNS u/s 61 (2) (a), 65(1), 351(3), r/w section 6 jong ka POCSO Act ba la register ha thanad pulit ha Garamur. Ngi la kem ia 6 ngut ki briew kynthup ia arngut ki khynnah rit hadien ba la dep ban ujor da ki dkhot jong ka iing. Ia kine ki khynnah ba dang rit ka rta la phah Juvenile justice home bad kiwei pat ba shah kynnoh la phah sha phatok,” la ong uwei u heh pulit.
Ka jingtohkit ka dang iaid mynta, bad ki bor pyniaid ki la pynthikna ba yn leh da kaba tyngeh ia baroh lada lap ba ki donkti.
