Shillong Jylliew 29: Ka Thma u Rangli (TUR) ka ai ka jingkyrshan kaba pura ia ka jingiakhih jong ki nonghikai Adhoc kiba don hapoh ka shatri jongka Federation of All School Teachers of Meghalaya (FASTOM) na ka bynta ki jingdawa kiba shongain bad shongnia jong ki.
Ka nongialam jong ka TUR ka Kong Angela Rngad kala pynpaw ba ka long kaba jah burom ia ka Sorkar MDA kaba la ialamkhmat da ka NPP, UDP, BJP, HSPDP, PDF, ki san ngut kiba la phet na ka Congress bad ki MLA shimet, ba kan shu pynthamme da ki jingkular kai ban pyntreikam ia ki jingdawa jong ki nonghikai.
“Ka TUR ka kyrshan bad dawa lang ryngkat bad ki nonghikai ba ka sorkar kadei ban ai noh ia ka tulop kaba lah ban kyrshan pura ia ka jingim bad ka iing ka sem jong kine ki Nonghikai” kala ong.
Ka Kong Angela kala ong ba ka long kaba kyndit ba ki jingdonkam kiba kongsan jong ki nong shong shnong kum ka koit ka khiah, ka pule puthi, ka bam ka dih bad ka kamai kajih, ka jylla ha kine ki san phew snem kam shym lah ban pynbiang sha ki nongshongshong bad ka long ka Jylla kaba leh sniew bad sahdien tam ha kine ki liang.
“Ka kaiphod halor ka pule puthi kaba la tip kum ka PGI 2021 kaba la pynkhreh da ka tnat NITI AYOG, ka pynpaw ba ka Jylla Meghalaya kadei ka jylla kaba don sha trai duh ha ka pule puthi. Kawei na ki daw ka long ba ka Sorkar Jylla kam shym lah ban pynbiang iaki jingdonkam jong ki nonghikai ha ki jaka hikai jong ki, kaba kynthup ruh ia ka jingsiewtulop” kala ong.
Haba pynpaw ia ka jingbynniaw ba ka Sorkar Jylla na ka por sha ka por ka ong ba kam don pisa ban pynkiew ia ka tulop bad pynbiang ia kiwei ki jingdonkam jong ki nonghikai, ka kong Angela kala ong “Kane ka jingong, ka long ka bym lah ban pdiang satia namar kane kajuh ka Sorkar ka kloi ban pynsyrwa kai ia ka pisa paidbah ban thied ia ki kali thymmai kiba remdor, ban tei ia ki jingtei ki bym phoida bad kiba tor, ka pynlut kai ia ka pisa ha kaba pynthamme bad kiwei kiwei”.
Ka Kong Angela kala ong “ Ka SorkarJylla ka mlien mynta ban shim ia ki ram na ki Bank kum ka ADB ha ka kyrteng ban tei ia ki skul bad ki kolej. Ka jingkylli ka mih mano ban kit bad siew ia kane ka ram? Ka jingma kaba khraw ka ap ia ka lawei, ka long ba ma ngi hi ki nongshong shnong bad ki khun jong ngi kin hap ban kit bad siew ia ka ram”.
“Ka kaiphod jong u Auditor General ka pynpaw ba ka Sorkar Meghalaya kala pynduna pynban iaka jingpynlut na ka bynta ka pule puthi haduh kumba 68 klur tyngka ha ka snem 2020-2021. Ka tnat pule puthi ruh ka hap ban shim ia ka jingkitkhlieh namar ba kam shym la lah ban pynbiang ia ki kot ki sla ban pynshisha halor ka jingpynlut ba ka ioh na ki grant ne jingkyrshan bapher bapher kaba la kot shaduh ka 2264 klur tyngka” kala ong haba bynrap “Kine ki dak jingkhein ki pynpaw ba ka Sorkar Meghalaya kam don jingkitkhlieh eiei halor ka kam pule puthi. Ka jingeh kam dei ka jindon ne jingbym don tyngka, hynrei ka jingeh kaba khraw tam ka dei namar ia ka jingpyndonkam bakla ia ka pisa lane ka jingbym lah ban pyndonkam ia ka pisa”.
