Shillong, Jylliew 29: Ka All India Trinamool Congress (AITC) hynne ka sngi Balang, kala kyntu ia u Myntri Rangbah ka Jylla Conrad Kongkal Sangma, ba un sangeh noh ha kaban long u nongshah khyrwait shabi (puppet) jong ka BJP.
Kane ka jingkyntu kala mih na u General Secretary ka AITC u Ahishek Banerjee haba kren ha ka jingplie ia ka jingpynrung dkhot ia ki nongkyrshan ha Meghalaya, kaba la long hadien ka jingplie paidbah ia ka Ophis jong ka party ha Lachumiere.
“U Conrad Sangma lada u dang don ka burom halade, sangeh noh ban long u nongshah khyrwait shabi jong ka BJP” ong u Abhishek haba kynthoh ba ka long kaba jah burom ia u Myntri Rangbah ka Jylla, uba la lapmiet ka leit bam ja sngewbha sha Delhi katba ka Jylla ka dang mad ia ki jingjynjar na ka jinglynshop ki bor ka mariang.
Une u Nongialam ka AITC ula ong “Ki (NPP-BJP) la thaw ia ka kynhun synrop bala tip ka Meghalaya Democratic Alliance (MDA) hynrei u Conrad u dei ban pynkylla kyrteng noh ia ka MDA sha ka ‘My Development Alliance’ namar kino kino ki kam pynroi ba wan ha kine ki san snem ka dei ka kam pynroi ia u Conrad Sangma”.
Une u General Secretary ka AITC ula kynnoh ruh ba ka Sorkar MDA ba ialam da ka NPP kala shu pyndem ialade da kaba ai lut ia ki jaka sha Assam ha ka jingpynbeit pud tang ban pynsngewbha ia ki Kynrad na Delhi.
Haba kyntu ia ki nong Meghalaya ba kin kyrshan noh ia ka AITC ban pynliem noh ia kane ka Sorkar ba mynta ha kine ki hynriew bnai ban wan, u Abhishek ula ong “Lada ka NPP ka dei u khniang (virus), ka Trinamool ka dei u dawai”
“Ai baka BJP kan wanrah lut ia baroh ki bor ba ka don bad ban kyrshan ia ka Unit ha Meghalaya bad ia u Conrad, hynrei nga kular ia phi ba ka Trinamool kan iakhun tad haduh ka jingjaw snam ba khatduh bad kan ym pyndem satia hakhmat ki briew kiba don ka bor ha Delhi” ula ong.
“Nga kular ia phi ba ha kine ki hynriew bnai ban wan ynda phi la ioh ia ka Sorkar thymmai, ka Meghalaya ka synshar ia ka Meghalaya, ka Bengal kan nym synshar ia ka Meghalaya. Nga kob ba ki don ki Nongialam ka BJP ha ka Ri kiba nud ban wan sha Meghalaya ban ong baka Gujarat, Madhya Pradesh bad Delhi kan ym don bynta ha ka jingim ki nong Meghalaya. Ki Khasi kin synshar ia ki Khasi, ki Garo ki synshar ia ki Garo bad ki Jaintia kin synshar ia ki Jaintia. Kane ka dei ka rai jong ka Trinamool” ula bynrap.
U Abhishek ula ong ba dei tang ka AITC kaba lah ban iakhun pyrshah ia ka BJP bad kaban lah ban pyni ia ka BJP haei ba ka dei ban shong.
Kiba la iadonlang ha kane ka sngi ki kynthup ia u President ka AITC Meghalaya Bah Charles Pyngrope, Nongialam ka AITC Legislature Party Dr Mukul Sangma bad u Incharge ka AITC-Meghalaya Dr Manas Ranjan Bhunia.
