Thmu u CM ban iakynduh ia u Amit Shah halor ka FCRA | Sngewkhia ia kyndon ban kurup jingdon jingem

Shillong, Jylliew 30 : U Myntri Rangbah Conrad K Sangma ha ka sngi Ba-ar, ula pyntip ba ka Sorkar Jylla kan sa rah iakren ia ki jingsngewkhia halor ka Foreign Contribution (Regulation) Act ba dang shu dep pynkylla thymmai bad u Myntri kam Pohiing ka Ri Amit Shah, bad ban pynsngew ia ka kyndon kaba ailad ia ki borkhmih ba kin kurup ia ki jingdon jingem lada ym pynthymmai ia ka FCRA.

U Conrad ula pyntip ba un sa pan ia ka por iakynduh bad u Myntri kam Pohiing ha ka taiew ba nyngkong jong u Naitung, hadien ka jingiakynduh bad ki Nongialam Niam ba long ha ka 27 tarik Jylliew-kaba iakren halor kane ka kam.

“Ha kine ki khyndiat sngi bala leit, kata ha ka 27 tarik Jylliew, Nga la iashong jingialang bad ki Nongia lam Niam. Kane ka dei ka jingpynbud ia ka jingialang kaba nga la don bad ki Nongialam Niam lem bad u Myntri kam Pohiing ha ka por ba u wan sha Shillong, ha kaba ngi la iakren ia ki kyndon bapher bapher jong ka FCRA” ong u Conrad haba iakren bad ki nongthoh khubor.

U Conrad u pyntip ba u Myntri kam Pohiing ka Ri ula pan ia ki jingtip kiba bniah halor ki kyndon kiba sngewkhia da ki Nongialam Niam bad ka Jylla.

U Conrad ula kdew ia ka clause 5 jong ka kyndon 16(a) ha ka Bill kum ka jingsngewkhia kaba hakhmat eh.

“Tang ban shu kdew, ka Para 16(a), kyndon 5 jong ka Bill ka kren shai halor ka jingbuh ia ka bor khmih, bad ong ba lada ym pynthymmai ia ka FCRA, kane ka borkhmih ka lah ban kurup noh ia baroh ki jingdon jingem” ula ong.

“Kane ka kyndon ka dei kaba sngewkhia jur eh ia ngi. Kumta ngi la iakren halor kane bad ngi la rai ban ialeit sha Delhi, bad ngin sa pan ia ka por ban iakynduh ia u Myntri kam Pohiing” ula bynrap.

U Myntri Rangbah u pyntip ba ki Nongialam Niam kin sa pynkhreh ia ka dorkhas ka ban sa aiti sha u Myntri kam Pohiing.

U Conrad u ong ba ka jingthmu hi ka long ban pynthikna ba kane ka Act kan nym ktah ia ki seng niam.