Shillong, Jylliew 30: Ka Chief Justice ka Meghalaya High Court Revati Mohite Dere kala buh ia u maw nongrim ban shna ia ka District and Sessions Court Complex ba pura na ka bynta ka East Khasi Hills ha Umsawli, Mawpat, kaba long ka mawjam kaba kongsan ha kaban pynkhlain ia ka kam bishar jong ka jylla.
Ha kane ka sngi la don lang u Myntri ka tnat Law u Bah Lahkmen Rymbui, ki Nongbishar ka Meghalaya High Court naduh u Justice H.S Thangkhiew, u Justice W. Diengdoh bad u Justice B. Bhattacharjee, President ka Shillong Bar Association u HR Nath nalor ki ophisar, ki dkhot ka Bar Association bad ki heh sorkar.
Haba kren ha kane ka jingialang, ka Chief Justice ka Revati Mohite Dere ka la batai ba kane ka jingialang ka long ka ba kongsan bad ong ba u mawnongrim u dei ka dak jong ka jingsdang jong ka rukom ai bishar hok, kaba kham khlain haka Jylla.
Ka la ong ba ka District Court kaba la don mynta ha Shillong kaba la treikam la palat shispah snem, kam lah shuh ban pdiang ia ka jingbun ki mukotduma bad kam don jaka kaba biang na ka bynta ki nongbishar, ki nongiasaid ain bad ki nongmudui.
Ka la ong ba ka Court Complex ba thymmai kan pynthikna ia ka burom kaba kham khraw ia ki nongmudui, kan pynbha ia ka jinglah ban ioh ia ka hok, kan pynsuk ia ka jingpyndonkam ia ki kor teknoloji na ka bynta ban pynbeit kloi ia ki mukotduma bad kan pynbiang shuh shuh ia ki kamra shong bishar bad ban pynduna ia ka jingpynslem haba ai bishar.
Da kaba pynksan ba ka District Judiciary ka dei ka jaka ba nyngkong eh ban ïakynduh ïa kiba bun ki nongshong shnong bad ka rukom ai hok, ka la ong ba ïa kane ka jaka thymmai yn tei halor ki nongrim jong ka jinglah ban ïoh bishar hok, ka jinglong ba janai, ka jingtreikam kaba hok.
Kala pynpaw ïa ka jingdonkam jong ki jingtei kiba mynta ha kaba pyntreikam ïa ki kyndon jong ka Bharatiya Nagarik Suraksha Sanhita (BNSS), 2023, kynthup ïa ki lad ban ring video ïa ki sakhi, ka e-filing, ki kamra buh sakhi bad ka jingïalang video. Ka la ong ba ki jingtei thymmai kam dei kaba pyni iaka jingriewspah hynrei ka dei ka jingdonkam ban pynthikna ia ka hok ha ka por kaba biang.
Ka la ong ruh ba ïa kane ka complex thymmai la shna ym tang na ka bynta ki nongbishar hynrei na ka bynta uwei pa uwei u nongshong shnong uba wad ïa ka hok, kynthup ïa ki kynthei, ki khynnah, ki nongrep, ki nongbylla sngi bad kiwei kiwei ki bynta jong ka imlang sahlang.
Ka la iaroh iaka jingkyrshan jong ka Sorkar Jylla, ka Sorkar Pdeng, ka High Court Registry, ki Engineer bad baroh kiba don bynta ban pynlong ïa kane ka projek kaban seisoh.
Haba kren ha kane ka sngi, u myntri ka tnat Law u bah Lahkmen Rymbui u la ong ba ka jingshna ia ka District and Sessions Court Complex kaba thymmai kan pynkhlain shibun ia ka rukom ai hok ha kane ka jylla Meghalaya.
U la kdew ba ka jingwan sar ka khlam COVID-19 ka la pynpaw ïa ka jingdonkam ban pynbha ïa ki lad pynïaid bishar bad ban pynïasoh kham bha bad ki kor teknoloji.
U Bah Lahkmen u la pynthikna ba ka Sorkar Meghalaya kan ïai bteng ban ïatreilang bad ka High Court ban ai ka jingkyrshan kaba donkam na ka bynta ban pynbha ïa ki jingtei jong ka ïingbishar ha baroh kawei ka jylla.
U la pynpaw ka jingkyrmen ba ia kane ka projek yn pyndep ha ka por ba la buh bad ong ba ka jingpynkhlain ia ki jingtei kan kyntiew ia ka jingshaniah jong ki paidbah ha ka tnat Law bad kan pynthikna ia ka jingpynpoi ia ka hok ha ka por kaba biang.
