Shillong, Nailur 16 : Ka Jaintia Students Union (JSU) kala ai ka jingkyrshan ba pura iaka jingdawa jong ka Society for Study of Law, Jaintia Hills ban buh ia ka National Law University ne ka jaka pule Aiñ ha rilum Jaintia.
Ka JSU hapoh ka jingialam u President u Bah Jersom Shylla bad u General Secretary u Bah Treiborlang Suchen, hynne ka sngi, kila phah iaka dorkhas sha u u Myntri Rangbah ka jylla Conrad Sangma, Myntri ba dei peit ia ka Law James Sangma, u Myntri ka pule puthi Bah Lahkmen Rymbui bad sha baroh ki MLA na Rilum Jaintia bad ki MP ka jylla kiba kynthup ia u Bah Vincent Pala bad Bah W.R Kharlukhi ban pynsngew iaka jingdawa ka jongki.
Ki nongialam ka JSU, kila pynpaw ba ka Jaintia Hills kadei ka thain kaba haduh mynta, kam pat don ia kino kino ki jaka pule ba kongsan (Premier Institute) watla mynta la don 50 snem ka jingioh ia ka jylla ba pura.
“Ka Jaintia Hills kam don kino kino ki jaka pule ha ki Graduate Professional Course bad watla kiwei pat ki District kila don iaki jaka pule kum ka NEHU Shillong bad Tura Campus, NIT, NEIGRIHMS, IIM Shillong bad kiwei kiwei bad la tyrwa ruh mynta ban tei iaka Shillong Medical College, Shillong Engineering College, Tura Medical College, Diary & Vertinary College Ribhoi, Fishery College, Garo Hills hynrei ym shim la don ban phaikhmat pat sha ka Rilum Jaintia” la ong haka Dorkhas.
Ka JSU kala pynpaw ba ka rilum Jaintia kala sei bun ngut ki nongiasaid aiñ kiba tbit bad ka Khadar Doloi Law College kaba don ha Jowai, kadei ka Law College kaba la pyniaid da ka Society for Study of Law, Jaintia Hills naduh u snem 1986, kumta ka JSU ka dawa ban tei iaka National Law University ha Rilum Jaintia naka bynta ka jingbit jingbiang jong ki samla pule Aiñ.
