Shillong, Nailur 16: Ka Borsing Syiem Children’s Home kaba don ha Mawsmai, Sohra, haka sngi Palei, kala ioh pdiang ia kawei ka kali na ka MDC jong ka Nongshken ka Kong Grace Mary Kharpuri lyngba ka Chief Minister Rural Development Fund (CMRDF).
Ka Kong Grace kala ong, ba ka jingwan pyllait paidbah ïa katei ka kali kam don bynta bad ka Politik ïoh ki paidbah ki shim da kumwei pat, hynrei kaei kaba jia kadei beit ka jingpyniaid ba stad jong u Blei.
“Nga dei ka MDC jong ka Nongshken bad kumta ngam lah ban wanrah ïa ka skhim MDC jongnga nangtai shane. Kumta nga phaikhmat sha u Myntri Rangbah ka Jylla u Conrad K Sangma ban ïarap lem ia kane ka Children’s Home khamtam haba ki khynnah ki mad ïa ka jingeh ha u slap, u phria haba ki leit sha skul bad ruh ha ka pang ka shitom. U Myntri Rangbah khlem kyrngah bad ula ïarap bad pynïoh ïa kane ka kali bad kane baroh ka urlong, da ka jingïarap jong u” ong ka Kong Grace.
U Pastor R Bareh ula ïathuh lyngkot shaphang ka jingeh ba katei ka jaka ri ka kynduh bad ula iathuh, ba ha katei ka jaka sah, ki don 12 ngut ki kynthei bad 14 ngut ki shynrang.
Ha kane kajuh ka sngi, na ka liang ka District Sohra – Mawsmai kila pynkup burom kyrpang ruh ïa u heprit Jedaia Rajee uba dei uba nyngkong eh na katei ka jaka ri khunswet kaba sdang naduh u 2015 ban pyndep ïa ka eksam Matrik.
Ka Kong Grace Kharpuri kala sam ruh ia ki nep kup syaid sha baroh kitei ki heprit kynthup ïa ki nongpeit jong ki, ha kaba la iadonlang u Rev. JM Passah, Rev. P Kharwanlang, ki Pastor, ki Tymmen Basan bad kiwei kiwei.
