Kular ban wad lad ka Sorkar halor ki jingdawa pynkiew tulop 100 %
Shillong, Risaw 15 : U Myntri ka Tnad Pule Puthi Rakkam A Sangma ula kular baka Sorkar kan sa wad ia ki lad ki lynti ban leh eiei halor ka jingdawa jong ki nong hikai SSA ban pynkiew tulop 100 % bad ban ai jingshngain ia ka jingshakri jong ki haba kyntu ia ki Nonghikai ba iakhih ba kin pyrkhat lem ia ka bha ka miat ki khynnah bad ban leit phai noh shala ki jong ki skul.
Haba iakren bad ki lad pathai khubor, u Rakkam ula ong ba ka rai ban pynkiew ia ka tulop jong palat 13000 ngut ki nonghikai SSA ka dei ka bym lah ban pynurlong mynta mynta haba khmih ia ka jingkyrduh pisa bala mad da ka Sorkar Jylla.
“Hynrei, ngi dang pynkhreh ia ka formula. Ngi la dep shong kawei ka jingialang ha ka taiew bala lah bad u Myntri Rangbah ka Jylla Conrad K Sangma. Ngin sa iashong biang. Ngi la dep bthah ia ki Ophisar ba kin pynkhreh ia ka formula kumno ban leh eiei halor ki jingeh ki nonghikai SSA ha Meghalaya” ula pyntip.
Haba kyntu ia ki nonghikai ba iakhih ba kin leit trei noh iala ki jong ki kam, u Myntri ula ong “Nga sngew sih ba ki nonghikai jong ngi kila iashong sha surok bad madan ialehkai hynrei ha kawei ka liang nga don jingsngew ruh ia ki khynnah skulk aba ki dei ban leit hikai. Mynta ba dang plie ki skul, nga kyrpad ia baroh ki nonghikai ba kin leit phai noh shala ki skul, bad pyrkhat lem ia ki khynnah ruh. Ki Khynnah skul ki lah ban ap ia ki ha ki skul”.
Ka jingiapait iapra hapdeng ki Nonghikai SSA kala paw shai bha mynta ha kaba kawei ka kynhun-ka Meghalaya SSA Schools Association (MSSASA) kala ipor arbnai ia ka Sorkar ban wanrah ia ka Policy ban shimti noh ka Sorkar ia ka jingshakri ki nonghikai SSA katba kawei pat ka kynhun-ka All Meghalaya SSA School Teachers’ Association (AMSSASTA) kala pynlong ia ka jingiakhih da kaba iashong kyllain ungor kaba la iaid mynta la 15 sngi ban dawa pynkiew tulop ba 100% ia ki nonghikai SSA.
Haba kubur ba baroh artylli ki jingdawa ki dei kiba shonghok, u Myntri ula ong pat ba ka jingiapait iapra hapdeng ki para nonghikai SSA kam dei satia ka dak kaba bha.
Haba kylli halor ka jingkynthoh ba ka Sorkar kam khot iakren ia ki nonghikai ba iakhih, u Rakkam ula ong ba ka Sorkar kala dep iakynduh la bunsien ia ki bad ka jingkhang ruh ka plie beit ia ki ban wan iakren. Hynrei u ong ba ka Sorkar ka hap ban buh hakhmat ia ki kam ba kongsan kum ka jingshlei um ha Ri-lum Garo kaba la shim ia bun tylli ki mynsiem briew.
“Mynta ba nga la wan, nga lah ban iakynduh ia ki ha kano kano ka por namar nga don hangne na ka bynta jong ngi bad na ka bynta ki paidbah” ula kular.
