Kyrpad ka SCPCR ban shna bun ki park bad SOP ban shngain ki Khynnah ba leit shabar Jylla

Shillong, Naitung 16 : Ka Chairperson ka Meghalaya State Commission for Protection of Child Rights (MSCPCR) Agatha K Sangma kala kyrpad ia ka Sorkar Jylla ba kan shna ia bun ki park na ka bynta ki khynnah bad ka jingdonkam ia ka Standard Operating Procedure (SOP) ban pynthikna ia ka jing shngain bad ka bha ka miat ki Khynnah, kiba leit sha kiwei pat ki Jylla jong ka Ri.

Ka Agatha kala buh ia kane ka jingkyrpad hakhmat u Myntri Rangbah ka Jylla Conrad K Sangma bad u Myntri ka Tnad Social Welfare Bah Paul Lyngdoh.

Ka SOP kan pynthikna ba ki Seng/kynhun bad riew shimet kin hap ban bud ia ki kyndon bala buh haba ialam ia ki Khynnah shabar ka Jylla.

“Nga la iakynduh ia u Myntri Rangbah bad Myntri ka Tnad Social Welfare hynne ka sngi ban shna kham bun ki madan phlang, ki park ha ka sor jong ngi” ong ka Agatha haba iakren bad ki nongthoh khubor ha ka sngi Balang.

Ka Chairperson kala ai jingbatai ruh ia u Myntri ka Tnad Social Welfare halor ka rai ba donkam ban thaw noh ia ka SOP na ka bynta ka jingshngain jong ki khynnah kiba leit shabar ka Jylla lane ba shah ialam shabar ka Jylla da ki riew shimet lane ki kynja seng-ha ka jingialang ba dang shen bad ki Tnad bapher bapher kynthup ka tnad Pule Puthi, Tnad Pulit, Tnad Ain, Tnad ka Koit ka Khiah bad kiwei kiwei.

“Ka dei ban don ka SOP ba kin hap ban bud namar bunsien ki khynnah haba ki shah ialam shabar, ka Sorkar kam don jingtip satia shaphang jong ki bad dei tang haba jia kano kano ka jingjia ba ngi sa ioh jingtip. Kumta ngi donkam ban tehlakam da kaba pynthikna ba ngi dei ban tip shano kine ki khynnah ki don. Kumno ka rukom im jong ki bad kiei ki jaka pule bala phah ia ki. La ki dei ki jaka pule ba ithuh da ka ain, wat ki hostel ruh la ki dei kiba la ithuh” kala ong.

Haba kylli, ka Chairperson kala ong “Ka dei ka jingai jingmut jong ka Commission ba ngi dei ban don noh ia ka SOP bad ngi la shim ia ki jingai jingmut na ki Tnad bapher bapher ba kum kiei kita ki kyndon ha ka SOP ban gin thaw bad nga kyrmen ba ka Sorkar kan pyniaid shakhmat ban pynmih ia ka SOP. Shisien ba ngi la don ia ka SOP, ngin sa don ia ka thup jong ki jaka pule namar kin hap ban bud ia ki SOP shuwa ba kin shim ia ki khynnah napoh ka Jylla jong ngi”.

Ka Chairperson kala pyntip ruh ba ka MSCPCR kala pynlong ia ki jingialang ha ki skul ban ai jingbatai bad pynsngewthuh halor ka hok ki khynnah, ka jingjrong kti khlemakor ia ki khynnah bad ka jingshah lehbein ha iing ha sem.

Ka Agatha kala ban jur ia ka jingdonkam ban wanrah ia ka jinglong jingman kaba pynsuk ia ki briew ba kin wan pyntip ia ki jingshah thombor ne jingleh bymhok.