Shillong, Nailur 18: U President ka MPCC u Bah Vincent Pala ula ong ba ka Congress ka kyrmen ban leh bha ha kane ka elekshon MLA-2023 ha Jylla namar ka jingioh ka party ia ki kyrtong kiba biang ban iamih aireng.
“Baroh shi katta ngi la shem jingeh ban ioh ia ki kyrtong ban iakhun ia ka elekshon, hynrei mynta ka seng Congress kala ioh ia ki kyrtong kiba biang kiban leh bha haka elekshon MLA ban wan” ong u Bah Vincent.
Une u Nongialam ka Congress ula ong ““Ngi la iaid bha shakhmat ha kine ki shi snem tam, ha kaba nyngkong ngim shym la ioh ia ki kyrtong hynrei mynta ngi la ioh ia ki kyrtong kiba biang bha, ngi la pynkhreh bha bad ngin sa leh bha ha ka elekshon, watla ki kyrtong kin ioh por sa tang 5 bnai ruh hynrei kin sa leh bha”.
U President ka MPCC u la ong ruh ba ka seng Congress kam dei kaba tlot hynrei kan dei hi ka seng kaban ieng ialeh pyrshah ia kiwei bad ki nongthep vote ruh ki dang kyrshan hi iaka Congress la kadei ha Jaintia Hills, Ri Bhoi, West Khasi Hills ne Garo Hills.
“Ki paidbah kin jied beit iaka Congress la kidei ki nongrep, nongkhaii ne nongtrei sorkar namar kila mad iaki jingeh ha kine ki 5 snem bad ka jingkyrmen iaki kadei ka seng Congress. Kumta, kan shong beit ha ngi lada ngi pynieng iaki kyrtong kiba biang, kiba la nang la stad bad ki bym don dak sniew, kin leh bha haka elekshon” ong u Bah Vincent.
“Bun ki briew ki khein troin iaka Congress hynrei lada khmih bniah ia ki constituency, ngi la leh bha shibun bad ngam tharai ba ngin donkam ban iatehlok badno badno haka jingiakhun iaka elekshon MLA ban wan” ula bynrap.
U la ong, ka Congress ka thmu ban pynieng 60 ngut ki kyrtong hynrei kan shong ruh ha kiwei pat ki seng sain pyrthei kiba pynieng ia ki kyrtong, kumta kan long kaba kloi palat ban ong katno ngut ka Congress kan pynieng kyrtong.
Haba kylli la kadei ka jingshisha ba u Dr Mukul Sangma u thmu ban rung biang sha Congress bad lada u rung, u Bah Pala yn mih noh? u Bah Pala u la ong, “kane kadei tang ka khubor hamsaia, la da u Mukul u rung ne u mih, kam don bynta eiei bad nga hynrei kadei kaba la leh da ma u bad kiwei pat. Kane baroh kadei tang ka hamsaia bad kan sah hi kum ka hamsaia. Ngam tharai ba u Mukul yn phet seng biang ban wanphai sha Congress, namar u khamstad ma u bad ia nga ne ia phi”.
