Nongpoh, Nailur 18: Kum shibynta ka jingrakhe ïaka Raktdaam Amrit Mohotsav lane ka Blood Donation Campaign kaba dei ka bynta jong ka jingrakhe dap 75 snem ka Ri, ka Hynniewtrep National Youth Movement Northern Region, ka TULBA Nongpoh Circle bad ka Ai-Jingim VBDO ha ryngkat ka jingïatrei lang bad ka Blood Centre Civil Hospital Nongpoh mynnin ka sngi ka 17 tarik Nailur, ki la pynlong ïa ka program ai jingpynshai halor ka jingkordor ban ai snam bad ban noh synñiang da ka Snam sha ka Nongpoh Blood Bank.
Lah ban kdew, ba ka Raktdaan Amrit Mohotsav ka dei ka program ba la pynlait paidbah da ka Tnad ka Koit ka Khiah ka sorkar pdeng bad la bthah ïa baroh ki jylla ban rakhe ïa ka haduh ka 1 tarik Risaw kaba dei ruh ka sngi National Voluntary Blood Donation Day.
Ka jingthmu jong kane ka program ka long ban pynshlur ïa ki paidbah ba kin wan shakhmat ban noh synñiang ïa ka snam bad ka jingthmu kaba kongsan jong ka sorkar pdeng lyngba kane ka taiew ka long ban ïoh lum ïa ka snam haduh 1 lakh unit ha ka shisngi lyngba ki nongai sngewbha ïa ka snam khnang ba yn lah ban ai jingïarap ïa kiba donkam ïa ka snam ha kano kano ka por kaba kyrkieh.
Ha kane ka sngi la ïoh ruh ban ai ïaka jingpynshai ha ka ba ïadei bad ka jingdonkam ïa ka jingai snam ha ka ba la ïoh ïaka jingkren da i Dr. Tariang In-Charge jong ka Blood Centre Civil Hospital Nongpoh.
La ïa shimbynta lang ha kane ka sngi, da u Bah Alpius Dkhar, Vice President bad I/C Ri Bhoi Circle ka Ai Jingim VBDO, u Bah Markus Marten President HNYF Northern Region, Ka kong Larikordor Kharkhrang Dkhot Ai Jingim VBDO, ki Nurse ka Civil Hospital bad ki dkhot jong ka HNYF bad ka TULBA.
