Shillong, Jylliew 26: U Myntri ka tnad pule puthi ka Jylla ma Lahkmen Rymbui hynnin ka sngi saitjain ula kyrpad ia ki Balang bapher bapher ka Jylla ban shim ia ka bynta kaba khraw bha ha ka ban pynkylla dur noh ia ka kam sain pyrthei hapoh ka Jylla.
“Ka bynta jong ki Iingmane bad ki Balang ka long ban wanrah ia ka jingkylla ha ka kam sain hima sima. Baroh ki iakren ba kumno ka pisa kan trei borbah ha ka elekshon ban wan bad ki Balang kin hap shim ia ka bynta ha ka ban hikai kumno ban jied ia ki Nongialam ban wan” ong u ma Lahkmen haba kren ha ka jingplie ia ka jingrakhe shispah snem ka Balang Unitarian ha Nongthymmai.
U Myntri ula ong ba ki Iingmang bad ki Balang ki dei ban hikai iala ki jong ki dkhot bad iakren naba shit haba shai ban peit ia uno u kyrtong uba lah ban noh synniang kham bun sha ka imlang sahlang ha ka Jylla.
U Myntri ula ong ba ma u kum kiwei pat ki riew sain pyrthei ba dang thymmai, kim itynnad satia ia ka jingiadi ka kam sain pyrthei kaba long mynta hapoh ka Jylla.
“Ngi dei ban pyrkhat ia kaba kumno ka imlang sahlang ngi kwah ha ka lashai lashisngi. Ki Balang ki dei ban iakren ia kaei kaba ki nongmihkhmat (MLA/MDC) ki lah ban leh n aka bynta ka Jylla hynrei ym ba katno ki kyrtong ki don pisa” ong u ma Lahkmen ha kane ka jingialang kaba la wan iashimbynta da baroh ki nongialam jong ki Seng Niam ka Jylla.
Shuwa kane, u MP ka Lok Sabha ma Vinceng H Pala bad MLA ka Nongthymmai Bah Charles Pyngrope kila kren halor ka jingdon jingiadei jong ki bad ka Balang bad ki kam ba kala leh ha Ri-lum Khasi Jaintia naduh bala seng ia ka da u Babu Hajam Kissor Sing Nongbri ha u snem 1887.
