Kot 2.5 lak kiba dik droks ha Jylla
Shillong, Jylliew 26: Ka Sorkar Jylla kala shim rai bad buhthong ban rat dyngkhong noh ia u droks bad kiwei ki jingdih pynbuaid hapoh kine ki san snem ban wan ha Jylla.
Ka Sorkar kala pyntip ruh ba ka Jylla ka don mynta kumba 2.5 lak ngut ki Nongshongshnong kiba dih droks kynthup ia ki briew ba shu injek bad kiba dih ia ki kynja dawai pynbuaid.
Haba kren ha ka jingialang ban rakhe ia ka International Day against Drugs Abuse bad Illicit Trafficking ba long hynnin ka sngi ha U Soso Tham Auditorium, u Symbud Myntri Rangbah ka Jylla Bah Prestone Tynsong ula ai jingmut ia ka jingdonkam ban wanrah noh da ki kynja Mission ne kynja treikam ba kyrpang ban rat dyngkhong ia ka jingjyllei u droks hapoh ka Jylla.
“Lada phi lah ban don ia ki Livelihood Mission, la ka dei ha ka kam rep, la ka dei ha ka koit ka khiah bad kiwei kiwei, ngi donkam ruh ban don ka Mission ha kaban sar bad rat dyngkhong ia u droks. Lada ka Sorkar Jylla ka lah ban kynshew kumba T.10 klur haba sdang, kala bha palat” ula ong.
Kat kum ka jingong jong u, kala donkam ia baroh ki nongshongshnong ban iasnohkti lang ha kaban iakhun ia u droks kumba ngi la leh ha ka jingiakhun pyrshah ia ka khlam Covid-19.
“Ka dei ban long da ka Movement u paidbah ha ka dur jong ka Mission. Ym slem shuh ba kane ka policy kan sa treikam. Nga la bthah ia u Principal Secretary ka Tnad Social Welfare ha ryngkat ka jingiasyllok bad ka Tnad Pulit ba kin pynkhreh ia ka rukom treikam ha ka dur jong ka Mission” ula ong.
“Shisien ba ngi la dep leh ia kane, ngeit ia nga ba hapoh ka san snem, da ka jingsngew skhem ngan ong ha phi ban ngin sa lah ban pynkut ia ki jingeh na u droks bad ki jingktah jong u droks hapoh ka Jylla” ong u bah Prestone.
U Myntri kam Pohiing ka Jylla ma Lahkmen Rymbui ula ban jur halor ka jingdonkam ban pynlong ia ki awareness programme ha ki skul bad ki college khnang ba ki khynnah skul bad ki samla pule kin tip halor ki jingktah jong ki jingdih pynbuaid. “Tang lada ki samla kila ieng ban ong em ia u droks, ka jingthmu jong kane ka jingrakhe kan long kaba seisoh” ula ong.
U Director General of Police (DGP) Dr Laija Ram Bishnoi ula pyntip ba kat kum ka khana samari 2019, ki don haduh 2.5 lak ngut ki briew kiba la kyrni ha ka jingdih drok kynthup kiba shu injek bad kiba dih da ki kynja dawai hapoh ka Jylla.
Na kine, ki don haduh 11420 ngut kiba shu injek droks, 43,620 ngut kiba dih Ganja, 1,64,814 ngut kiba dih Opioid, 24,700 ngut kiba dih da ki kynja dawai pynbuaid, 1300 ngut kiba dih cocaine bad 1400 ngut kiba dih ia ki amphetamine tablet.
Haba khmih ia ka jingkhaii droks hapoh ka Jylla ia mynta, u DGP ula ong ba namar ka jingiajan bad ka Golden Triangle, ka Meghalaya kala kylla long kawei na ka lynti iaid jong u droks bad kane kala pynlong ia ki bor ka ain ban hap peit pyrman bha ban lah tehlakam ia kane ka kam be-ain.
Kiwei pat kiba la kren ha kane ka jingialang ki kynthup ia ka Chief Secretary kong Rebecca V Suchiang, Dr. Pakha Tesia, MBBS, MD (Psychiatry) Mind and Wellness Clinic, Bah Bryan Wallang, Principal Kiddies Corner HS School bad u Sampath Kumar Principal Secretary ka Tnad Social Welfare.
Lah pynshongkun ia kane ka jingrakhe da ka jingialehkai skit halor ka jingdih droks da ki dkhot ka Kripa Foundation De-addiction Centre for Juveniles, ka jingrwai da u Neil Umwi bad Desmond Rimiki Sun, ka jingpynkup burom ia ki Pulit Ophisar bad kiwei kiwei.
