Tura, Naitung 17: U Deputy Commissioner ka West Garo Hills, Jagdish Chelani ula pyntip ba u Myntri Rangbah ka Jylla Conrad K Sangma un sa leit sha Tura ha ka taiew ban wan bad un sa iakren bad ki dkhot ka ACHIK, kiba iashong shah jingit mynta ka 7 sngi. Namar kata, ula kyntu ia ka ACHIK ba kan weng noh mardor ia ka jingshah jingit.
U DC ula leit ban jngoh ia kane ka jaka ba shah jingit kaba don mar pyrshah ka Mini-Secretariat ha ka sngi Nyngkong bad ula iakren ruh bad ki nongiakhih, kiba la buh ia artylli ki mat jingdawa- ban wanrah ia ka Winter Capital ha Tura bad ban pyntreikam ia ka Roster System naduh ki snem bala leit noh.
Ula ong ba ki Nongiakhih ki kwah ia ka jingtuklar hi shimet jong u Myntri Rangbah halor kine ki kam bad ba un ai ruh ia ki jingkular.
“Ngi la peitthuh bha ia ki kam ba kumno kane ka jingiashah jingit kala iaid. Ngi la peitthuh ia ka koit ka khiah jong ki….kaei kaba ki leh..Ngi lah iakren ruh bad u Myntri Rangbah, Symbud Myntri Rangbah bad ai khubor ruh ia ki halor kiei kiei baroh. U Myntri Rangbah ula ai ktien ba un sa wan sha Tura ha ka taiew ban wan bad un sa iakynduh bad kane ka kynhun ban sngewthuh ia ki jingdawa jong ki” ong u Chelani hadien ka jingialang bad ki nongiakhih.
“Kila dawa ia ka Winter Capital ha Tura bad ka jingpyntreikam ia ka Reservation Roster naduh ki snem bala leit noh” ula bynrap.
“Ha kane ka khep ba mynta, ka kynhun ka la pynpaw b aka kwah ia u CM ba un wan mih hi dalade bad ban iakren bad ki, ban ai ka jingkular sha ki ba un khmih ia kine ki kam bad ban pynbeit noh kham kloi kat kaba lah” ula bynrap.
Haba pynpaw ba ka kynhun kala ioh ia jan baroh ki jingthmu, ula kyntu ia ki ban weng noh ia ka jingshah jingit lem kumta lada ki dang iai bteng, ula ong ba kan dei ka buit khyrwait kti.
Pule ruh: Thoh u Nongialam ka BJP sha Delhi ban pyllait ia ka Meghalaya na ka Uniform Civil Code
