Gangtok, Nailur 17 : U kapten barim ka kynhun ialehkai football ka India u Bhaichung Bhutia ula kyntu ban pyntreikam ia ka Inner Line Permit (ILP) hapoh Sikkim khnang ba yn lah ban iada ia ka Article 371(F) jong ka Constitution.
Ka Article 371(F) jong ka Constitution kan ai ki jingiada na ka bynta ki hok jong ki nongshong shnong kiba dei ki trai shnong ka Sikkim.
U Bhutia uba dei ruh u nongseng bad president jong ka party sain hima hapoh ka thain, ka Hamro Sikkim Party (HSP) ula khot ia ki riew sain hima ka jylla ba kin kren bad ban iatylli lang kawei na ka bynta ban pynbor ban pyntreikam ia ka ILP hapoh Sikkim.
“Ka jingpyntreikam ia ka inner line permit hapoh Sikkim ka dei tang kane ka lynti ka ban lah ban ai jingiada ia ka Article 371 (F) hapoh Sikkim, kata ka ban iateh bad pynneh pynsah ia ki hok jong ki nongshong shnong kiba dei ki trai shnong ka Sikkim,” ong u Bhutia lyngba ki lad pathai khubor ha Gangtok.
Na ka liang u Bhutia u pynpaw ka jingsngewkhia halor ka jingsyier halor ka jinglong jingman hapoh Sikkim namar ka jingbun borbah jong ki briew kiba na shabar kiba shong ba sah ha kane ka jylla bad kiba ioh ia shibun bah ki jingmyntoi lyngba ki kot ki sla kiba shu shna thok.
“Shibun bah ki briew kiba na shabar kila shong la sah ha Sikkim bad kila don ruh ia ki Electoral Voter Identity Card (EPIC) nalor ki ration card lyngba ka jingpyndonkam da ki kot ki sla kiba la shu shna thok bad kaba buh ka jingma kaba krhaw halor ki hok jong ki nongshong shnong kiba dei ki trai shnong,” ula ong shuh shuh.
Ka jingpyntreikam ia ka ILP hapoh Sikkim dei ruh ban shim halor ki nongrim kiba iadei bad ki kam shong shngain kumjuh namar kane ka jylla ka dei kaba don jingma namar ki bynta khappud bad kiwei pat ki ri, kata bad ka China, Bhutan bad Nepal, kata nalor ka jingiajan ruh bad ka Bangladesh.
“Ka jingwan buhai shnong beain da ki briew kiba na bar khlem da don ia ki kot ki sla kiba biang kala buh ka jingma kaba khraw ia ka jylla bad ka ri hi baroh kawei,” ong shuh shuh utei u khlur ialehkai football barim.
