Kohima, Nailur 17 :Na ka liang ka BJP kala ieng skhem halor ka jingiateh na ka bynta ka jingiabhah seat bad ka Nationalist Democratic Progressive Party (NDPP) na ka bynta ka ilekshon Assembly 2023 ha Nagaland.
Ia kane ka pynpaw da u nongialam ba la rim ka party BJP uba dei ruh u incharge jong ka party na ka bynta ka jylla Nagaland, u Nalin Kohli.
“Ka jingiamynjur ha kaba iadei bad ka jingiabhah ia ki seat lah ban shim ia ka rai kaba khatduh. Ngi kyrmen ban ai ka jingshakri kaba bha tam na ka bynta ki nongshong shnong ka Nagaland sa shisien pat,” ong une u nongialam bala rim ka BJP u Nalin Kohli.
Katkum ka jingiamynjur kaba iadei bad kane ka jingiabhah seat ia kaba la dep ban shim ia ka rai kaba khatduh hapdeng ka BJP bad ka NDPP, ka saffron party (BJP) kan ia aireng na ka bynta ki 20 tylli ki seat, katba ka NDPP kan pynieng kyrtong na ki 40 tylli ki seat.
Lah ban kdew ba ia ka ilekshon assembly ha Nagaland kaba don 60 ngut ki dkhot yn pynlong ha kaba sdang jong ka 2023.
Ia kane ka kynhun synrop NDPP-BJP ha Nagaland la thaw ha ka snem 2018.Ha kane ka snem, ka NDPP kala iakhun na ki 40 tylli ki seat bad ka BJP ha ki 20 tylli.
Ha ka sngi Palei ba la lah, u national president ka BJP u JP Nadda ula sdang ia ka jingialap ilekshon ha Nagaland da kaba aijingkren ha ka jingialang paidbah hapoh Wokha district.
