Shillong, Iaiong 15 : Ka Meghalaya SSA Schools Association (MSSASA) ha ka sngi Ba-ar kala kyntu ia ka Sorkar Jylla ban aipor lai taiew ia ki skul SSA, ki bym mynjur ban aiti ia ki NoC ha kaban shimti noh ka Tnad Education, ba kin shim rai halor kane ka kam.
Kane ka kynhun kala aiti iaka dorkhas sha u Commissioner & Secretary ka Tnad Education Vijay Kumar Mantri hadien ka jingbthah ba dang shen jong ka Tnad ban aiti lane pyniasoh noh ia ka jing pyniaid ia ki skul SSA ba pyniaid ki Shnong, ki seng shimet, ki riew shimet, ki Mission lane Society sha ka Tnad.
U President ka MSSASA Bah Aristotle C Rymbai u pyntip ba katto katne ki skul kin dang ban aiti ia ki jingmynjur lane kim pat mynjur ban leh ia kane namar ki jingeh ban pynkohnguh ia ki Managing Committee jongki skul (SMC).
“Ngi sngewthuh ba kane ka kam ka long kaba bun jyrwit jyrwat bad kine ki skul ki dang donkam bun ka por ban shim rai ia ki lynti ba ki kwah. Namar kane, ngi kyrpad ia phi ban aipor lai taiew ia kine ki skul tad haduh ka 5 tarik Jymmang 2025 ba kin shim rai halor ka jingmynjur ban aiti ia ki NoC ban aiti noh sha ka Sorkar bad ban pynmih ia ki kyndon kiba shai na ka Tnad Education ban pynthikna ia ka jingpyntreikam kaba iaid beit iaid ryntih ha kane ka jingthmu” ula ong ha ka dorkhas.
Ka Association kala aiti ruh ia ki jingai jingmut halor ki kyndon jong ka Sorkar India ba ka Sorkar India kam shym la pyniapher ia ki skul SSA na ki skul Sorkar bad kumta kan nym don ka jingbuh nonghikai la ka jong kumba la mang da ka Sorkar Pdengg, hynrei, baroh ki nonghikai khatduh ka dei ka jingkit khlieh jong ka Sorkar Jylla bad ban peit sha ka Meghalaya Right to Children to Free and Compulsory Education Rules 2011 sub-rule (1) jong ka rule 18 kaba ong ” Ka Sorkar Jylla ne ki borkhmih, ki dei ban pynbna ia ki kyndon ka jingshakri bad ka tulop bad ki allowance jong ki nonghikai khnang ban ioh ia ki nonghikai ba pura” bad ki kyndon treikam ba thymmai ka SSA ba ong “Ki Jylla ki dei ban pynneh ia ki nonghikai bad ym dei ban pyniapher ia ki Nonghikai SSA naba ia baroh ki nonghikai khatduh yn hap ban pynlut da ka Sorkar Jylla”.
Ka Association kala ai jingmut ia ka jingdonkam ba ka Tnad Education kan pyniaid shakhmat ia ki kam jong ki skul SSA kiba la mynjur ban aiti ia ki NOC ba kin aiti noh ia ka jingpyniaid sha ka Sorkar.
“Kine ki skul kila pynpaw ia ka jingkloi ban aiti noh bad ngi kwah ba kane ka kam ka dei ban iaid noh shakhmat ban pynthikna ia ka jingshimti kaba iaid beit iaid ryntih” kala ong.
 ha ka sngi Ba-ar kala kyntu ia ka Sorkar Jylla ban aipor lai taiew ia ki skul SSA, ki bym mynjur ban aiti ia ki NoC ha kaban shimti noh ka Tnad Education, ba kin shim rai halor kane ka kam.){kind=link}